शारीरिक व मानसिक छळाची खोटी तक्रार क्रूरतेच्या आधारावर न्यायालयाकडून पतीला घटस्फोट मंजूर

पुणे, ता. २८ ः पती आणि त्याच्या कुटुंबावर आठ वर्ष पत्नीचा शारीरिक आणि मानसिक छळ केल्याचा खटला चालला. पत्नीच्या भावाने तिला माहेरी नेले व ती परत आलीच नाही. पत्नीच्या या कृत्याचे तिच्या भावाने आणि वडिलांनी समर्थन केले. पत्नीने दाखल केलेल्या खटल्यातून पती व त्याच्या कुटुंबीयांना निर्दोष सोडण्यात आले. या सर्व तथ्यांवरून स्पष्ट होते की, पत्नीने पतीशी क्रूर वर्तन केले. त्यामुळे पतीला क्रूरतेच्या आधारावर घटस्फोट मिळण्याचा अधिकार आहे, असे नमूद करत येथील सत्र न्यायालयाने पतीने दाखल केलेला घटस्फोटाचा दावा मंजूर केला.
अतिरिक्त सत्र न्यायाधीश पी. आर. चौधरी यांनी हा निकाल दिला. ३६ वर्षीय सुरेश आणि ३७ वर्षीय सुरेखा (नावे बदललेली) यांच्यात कौटुंबिक वादातून दाखल झालेल्या प्रकरणात न्यायालयाने हा निकाल दिला. सुरेखा आणि सुरेश यांचे २६ मे २००८ मध्ये लग्न झाले होते. त्यांना एक मुलगी आहे. पतीने पत्नीपासून घटस्फोट मिळावा, यासाठी घटस्फोटाचा दावा दाखल केला होता, तर पत्नीने सासरच्या मंडळींनी आपला शारीरिक आणि मानसिक छळ केल्याची तक्रार दिली होती. तसेच कौटुंबिक हिंसाचाराचा खटलादेखील दाखल केला होता.
पत्नीने दाखल केलेल्या गुन्ह्यात आठ वर्षे सुनावणी झाल्यानंतर सासरच्या मंडळींची निर्दोष मुक्तता करण्यात आली. दरम्यानच्या काळात पतीने घटस्फोटासाठी दाखल केलेला दावा फेटाळण्यात आला होता. पत्नीने दाखल केलेल्या गुन्ह्यातून निर्दोष मुक्तता झाल्यानंतर सुरेश यांनी ॲड. मधुरा देशपांडे यांच्यामार्फत सत्र न्यायालयात धाव घेत सह दिवाणी न्यायाधीश वरिष्ठ स्तर न्यायालयाने दिलेल्या निकालाला आव्हान दिले. सुरेखा यांनी सुरेश यांच्या विरोधात दाखल केलेली तक्रार खोटी असल्याने त्यांची गुन्ह्यातून निर्दोष मुक्तता झाली आहे. आठ वर्ष हा न्यायालयीन लढा सुरू होता. खोट्या आरोपांमुळे पतीला मोठा मानसिक त्रास सहन करावा लागला. त्यामुळे हा त्रास क्रूरता मानली जावी. पत्नीचे म्हणणे होते की, पतीचा घटस्फोटाचा दावा मंजूर करू नये. मात्र, ती कधीही नांदण्यासाठी यायला तयार नव्हती. दोन्ही पक्षांचा युक्तिवाद ऐकून घेत न्यायालयाने पतीच्या बाजूने निकाल देत क्रूरतेच्या आधारावर घटस्फोटाचा अर्ज मंजूर केला.

‘‘पत्नीने दाखल केलेल्या खोट्या तक्रारीमुळे पती आणि त्यांच्या कुटुंबीयांना आठ वर्ष न्यायालयीन लढा द्यावा लागला. त्यांची निर्दोष मुक्तता झाल्याने आम्ही पतीच्यावतीने क्रूरतेच्या आधारावर घटस्फोट मिळावा, यासाठी अपील केले होते. न्यायालयाने ते मान्य करत पतीचा घटस्फोटाचा दावा मंजूर केला. पत्नीने खोटी तक्रार केली असेल आणि त्यातून सासरचे मंडळी निर्दोष मुक्त झाले असतील, अशा प्रकरणांसाठी हा निकाल महत्त्वाचा ठरणार आहे.
-ॲड. मधुरा देशपांडे, पती सुरेश यांच्या वकील

न्यायालयाने निकालात नमूद केलेले महत्त्वाचे मुद्दे ः
- माहेरी जाण्याच्या पत्नीच्या कृत्याला तिच्या भावाने आणि वडिलांचे समर्थन
- पतीशी पत्नीचे क्रूर वर्तन
- पत्नी माहेरी गेल्यानंतर परत सासरी आलीच नाही
- घटस्फोटाचा आदेश होऊ नये म्हणून पत्नी सोबत राहण्यास तयार होती
- एकत्र राहायचे आहे, असे म्हणून पत्नी पतीविरोधात कौटुंबिक हिंसाचाराचा दावा केला
--------------------