जातीनिष्ठ विचारातून होणाऱ्या लेखनाने इतिहासाची हानी श्रद्धा कुंभोजकर यांचे मत ः सुराणा इतिहासकार पुरस्कार प्रदान

पुणे, ता. २८ ः ‘‘पुराव्याच्या अधिष्ठानाशिवाय इतिहासाचा अभ्यास करणे म्हणजे आपल्याच पायाखालची जमीन भुसभुशीत करून घेण्यासारखे आहे. जातीनिष्ठ विचारातून होणारे इतिहास लेखन हे इतिहासाची हानी करते. त्यामुळे अस्मितेच्या राजकारणात इतिहासाचा बळी जात असल्याची भीती वाटते.’’ असे मत सावित्रीबाई फुले पुणे विद्यापीठाच्या इतिहास विभागाच्या प्रमुख श्रद्धा कुंभोजकर यांनी व्यक्त केले.
क्वांटम फाउंडेशन आणि डेक्कन कॉलेज पदव्युत्तर व संशोधन संस्था अभिमत विद्यापीठ यांच्यातर्फे ‘प्रकाशचंद्र सुराणा इतिहासकार पुरस्कार’ सोहळ्याचे आयोजन करण्यात आले होते. फाउंडेशनच्या विश्वस्त पुष्पा सुराणा यांच्या हस्ते हा पुरस्कार कुंभोजकर यांना आणि गडकिल्ले, प्राचीन मंदिरे व पुरातत्वीय स्थळांवरील संशोधनाचे डिजिटल दस्तावेजीकरण करणाऱ्या इंग्लंडमधील केविन स्टॅंडेज यांना प्रदान करण्यात आला. स्टॅंडेज यांनी आभासी पद्धतीने हा पुरस्कार स्वीकारला. पुरस्काराचे हे चौथे वर्ष होते.
क्वांटम फाउंडेशनचे संस्थापक डॉ. प्रतीक सुराणा यांनी प्रास्ताविक केले. याप्रसंगी भारतीय पुरातत्वशास्त्रज्ञ डॉ. के. पद्दय्या, डेक्कन कॉलेजचे कुलगुरू प्रसाद जोशी, भाषाशास्त्र विभागाच्या प्रमुख प्रा. सोनल कुलकर्णी आणि पुरातत्व विभाग प्रमुख प्रा. शाहिदा अन्सारी, डॉ. नीलेश कुंभोजकर आदी उपस्थित होते.
फोटोः 35138