शांती, क्षमा, आरोग्याचा वॉकथॉनद्वारे संदेश साधू वासवानी मिशनचा उपक्रम

पुणे, ता. २८ : साधू वासवानी मिशनच्या युवा शाखा ‘ब्रिज बिल्डर्स’ यांच्या पुढाकाराने ‘मूव्हमेंट ऑफ कॅाल्म’ या वैश्विक वॉकथॉनचे आयोजन २६ जुलैला मुंबई, पुणे, नवी दिल्ली, बेंगळुरू आणि न्यूयॉर्क या प्रमुख शहरांमध्ये एकाच दिवशी एकत्रितपणे करण्यात आले. या उपक्रमामार्फत मिशनने समाजाला शांती, क्षमा आणि भावनिक आरोग्याचा संदेश दिला.
येत्‍या २ ऑगस्ट रोजी साजऱ्या होणाऱ्या ‘जागतिक क्षमादिनाच्या’ अनुषंगाने या वॉकथॉनचे आयोजन करण्यात आले होते. हा दिवस आध्यात्मिक गुरू दादा जे. पी. वासवानी यांची जयंती असून, त्यांनी आपले संपूर्ण जीवन प्रेम, करुणा व क्षमेसाठी समर्पित केले होते. वॉकथॉनचा प्रारंभ सकाळी साडेसहाला कोरेगाव पार्क येथील निसर्गरम्य मार्गांवरून झाला. औपचारिक उद्घाटन साधू वासवानी मिशनच्या प्रमुख दीदी कृष्ण कुमारी यांच्या हस्ते झाले. साधू वासवानी इन्स्टिट्यूट ऑफ मॅनेजमेंट स्टडीज येथून सुरू झालेला तीन किलोमीटरचा हा वॉक पुन्हा त्याच ठिकाणी संपला. यावेळी जमा झालेली सर्व नोंदणी शुल्काची रक्कम गरजू मुलांसाठी मोफत हृदयशस्त्रक्रियेच्या सेवेत वापरण्यात येणार आहे.
फोटोः 35134