संत नामदेवरायांचा सोहळा रंगला

पुणे, ता. २९ : मंगलमय वातावरणात श्री विठ्ठल, संत नामदेव महाराजांचे पूजन, सहस्त्रचंद्र दर्शन सोहळ्यातील धान्य तुलातून सामाजिक संस्थांना मदत, समाजभूषण पुरस्काराचे वितरण अन् मोगरा फुलला अभंगवाणी कार्यक्रम... अशा सामाजिक आणि भक्तिमय वातावरणात अनोखा सोहळा रंगला.
संत शिरोमणी नामदेव समाजोन्नती परिषदेच्या वतीने शहर व पिंपरी-चिंचवड परिसरातील विविध संस्थांच्या वतीने सामाजिक एकोप्याचे दर्शन देत संत नामदेव महाराज यांचा ६७५ व समाधी सोहळा रविवारी उत्साहात झाला. सोहळ्याचा प्रारंभ सकाळी संत नामदेव महाराज व श्री विठ्ठलाला अभिषेक आणि पूजा करण्यात आली. त्यानंतर समाजातील ८१ वर्षे पूर्ण केलेल्या ११ जणांचा सहस्त्रचंद्रदर्शन सोहळा व धान्यतुला करण्यात आली. विविध सामाजिक संस्थांना हे धान्य देण्यात येणार आहे. दुपारच्या सत्रात गायिका सन्मिता धापटे-शिंदे यांच्या रचना तर प्रा. गणेश शिंदे यांच्या निरूपणाचा ‘मोगरा फुलला’ हा संतवाणीचा कार्यक्रम सादर झाला. सायंकाळच्या सत्रात माजी आमदार व प्रतिशिर्डी साई मंदिराचे मुख्य विश्वस्त प्रकाश देवळे यांना ‘समाजभूषण पुरस्कार’ देऊन गौरविण्यात आले. शिल्पकार विपुल खटावकर यांचाही सन्मान करण्यात आला.
कार्यक्रमाच्या अध्यक्षस्थानी संत नामदेव महाराजांचे सोळावे वंशज मुकुंद महाराज नामदास होते. यावेळी केंद्रीय हवाई वाहतूक व सहकार राज्यमंत्री मुरलीधर मोहोळ, उच्च व तंत्र शिक्षणमंत्री चंद्रकांत पाटील, माजी मंत्री दिलीप कांबळे, माजी नगरसेविका स्मिता वस्ते, किरण बारटक्के, मुख्य विश्वस्त राजेंद्र पोरे, पिंपरी-चिंचवड समाज अध्यक्ष एकनाथ सदावर्ते, परिषदेचे अध्यक्ष संजय नेवासकर, शहराध्यक्ष संदीप लचके उपस्थित होते. सूत्रसंचालन रेणुका महाजन यांनी मानले.

संत नामदेव स्मारकासाठी बैठक घेऊ
भारतात भागवत धर्म व विठ्ठल भक्तीचा संदेश देत संत नामदेव महाराज यांनी संपूर्ण देशात कार्य केले, त्यांची कीर्ती त्यांच्या कार्यातून पाहावयास मिळते. संत नामदेव स्मारक पंढरपूर येथे होण्यासाठी मुख्यमंत्री देवेंद्र फडणवीस यांच्यासोबत बैठक घेऊन स्मारकाचे काम मार्गी लावण्याचेही आश्वासन मुरलीधर मोहोळ यांनी दिले. तसेच चंद्रकांत पाटील यांनी समाजोन्नती परिषदेच्या कार्याचे कौतुक केले.