‘हिरवाई’तून उलगडणार प्राण्यांचे सहजीवन

पुणे, ता. २८ : नागरिकांना स्थानिक देशी वनस्पतींबाबत जागरूक करणे आणि त्यांच्या लागवडीत जनसहभाग वाढवणे, या उद्देशाने ‘जीविधा’ संस्थेतर्फे हिरवाई महोत्सवाचे आयोजन करण्यात आले आहे. बुधवार (ता. ३०) ते शुक्रवार (ता. १) दरम्यान दररोज संध्याकाळी साडेसहा ते आठ या वेळेत राजेंद्रनगर येथील इंद्रधनुष्य पर्यावरण केंद्र येथे हा महोत्सव होणार आहे.
यंदाच्या महोत्सवाची संकल्पना ‘परस्पर संवाद’ अशी असून, त्यामध्ये वनस्पती आणि प्राणी जगत यांच्यातील परस्परसंबंधांविषयी माहिती देणाऱ्या व्याख्यानांचा समावेश आहे. बुधवारी (ता. ३०) ‘वनस्पती आणि कीटक यातील संबंध’ या विषयावर पर्यावरण अभ्यासक ईशान पहाडे यांचे व्याख्यान होणार आहे. गुरुवारी (ता. ३१) डॉ. अंकुर पटवर्धन हे ‘वनस्पती आणि पक्षी-सस्तनप्राणी यांच्यातील संबंध’ याविषयी माहिती देतील. शुक्रवारी (ता. १) आयसर संस्थेतील संशोधक डॉ. सागर पंडित यांच्याशी ‘वनस्पतींचा रासायनिक संवाद’ या विषयावर वनस्पतीतज्ज्ञ डॉ. महेश शिंदीकर चर्चा करणार आहेत.
वनस्पती स्वतःच्या अन्ननिर्मितीसाठी, घरट्यासाठी वा संरक्षणासाठी प्राण्यांवर अवलंबून असतात. दुसरीकडे, प्राणीही अन्नसाखळीचा भाग म्हणून वनस्पतींवर अवलंबून असतात. बीजप्रसार, परागीभवन आणि प्रजोत्पत्ती यासाठी कीटक, पक्षी, सस्तन प्राणी यांची भूमिका महत्त्वाची असते. हाच जैव सहजीवनाचा विषय या महोत्सवाच्या माध्यमातून उलगडण्यात येणार आहे. हा कार्यक्रम सर्वांसाठी मोफत असून, पर्यावरणप्रेमी आणि नागरिकांनी यावेळी उपस्थित राहावे, असे आवाहन राजीव पंडित आणि वृंदा पंडित यांनी केले आहे.
---------------