पिंपरी तार चोरीप्रकरणी दोन जणांना अटक

पुणे, ता. २७ ः पिंपरी रेल्वे स्थानकाच्या ओव्हरहेड इलेक्ट्रिक (ओएचइ) ताराचा भाग असलेल्या ‘एन्ट्री क्रिप वायर’ची चोरी केल्याप्रकरणी रेल्वे सुरक्षा दलाने दोन चोरांना ताब्यात घेतले आहे. यात एक अल्पवयीन मुलाचा समावेश आहे. शिवा नाटेकर असे तरुणाचे नाव आहे. अन्य काही जणांचा या चोरीत सहभाग असल्याचे रेल्वे सुरक्षा दलाला तपासात आढळून आले आहे. त्यांच्या शोधासाठी देखील ‘आरपीएफ’ची पथके रवाना झाली आहेत. चोरीची घटना शनिवारी घडली.
पिंपरी स्थानकावर २५ हजार व्होल्टचा विद्युतप्रवाह सुरु असताना दोन चोरट्यांनी ‘एन्ट्री क्रिप वायर’ची चोरी केली. सुमारे चाळीस हजार किमतीच्या तारेचा भाग होता. मात्र याची चोरी झाल्याने रेल्वे वाहतुकीवर परिणाम झाला होता. रेल्वे प्रशासनाने या प्रकरणाची गंभीर दखल घेत, कारवाईचे आदेश दिले होते. शनिवारीच आरपीएफला सीसीटीव्ही फुटेज मिळाले होते. त्या आधारे चोरांची ओळख पटली होती. त्याआधारे शिवा नाटेकर याला ताब्यात घेतले असल्याचे वरिष्ठ विभागीय सुरक्षा आयुक्त प्रियांका शर्मा यांनी सांगितले.