कालव्यालगतची अतिक्रमणे तातडीने काढा ः विखे पाटील

पुणे, ता. २८ ः कृष्णा खोरे महामंडळांतर्गत असलेल्या पाच जिल्ह्यामधील धरणांच्या कालवा आणि कालव्यालगत असलेली अतिक्रमणे काढण्याची कारवाई तातडीने सुरू करा, असा आदेश जलसंपदा मंत्री राधाकृष्ण विखे पाटील यांनी सोमवारी प्रशासनाला दिला.
कृष्णा खोरे विकास महामंडळाच्या कामकाजाबाबत जलसंपदा मंत्री राधाकृष्ण विखे पाटील यांनी आढावा बैठक घेतली. त्यावेळी महामंडळाचे कार्यकारी संचालक हनुमंत गुणाले, जलसंपदा विभागाचे मुख्य अभियंता हेमंत धुमाळ, विशिष्ट प्रकल्पाचे मुख्य अभियंता संजीव चोपडे आदी उपस्थित होते. त्यावेळी त्यांनी अधिकाऱ्यांना या सूचना दिल्या. गुणाले यांनी महामंडळाच्या अखत्यारीतील प्रकल्पांचे सादरीकरण केले. तेव्हा कृष्णा खोरे प्रकल्पांतर्गत सुरू असलेल्या प्रामुख्याने नीरा देवघर, कुकडी, गुंजवणी, टेंभू, म्हैसाळ यासाररख्या विविध महत्त्वाच्या प्रकल्पांच्या कामांना गती द्या, पाण्याची गळती आहे, अशा धरणांचे अस्तरीकरण, धरण सुरक्षेची मोहीम हाती घेऊन कामे पूर्ण करा, अशाही सूचना विखे पाटील यांनी यावेळी दिल्या.
खडकवासला धरण प्रकल्पातील खडकवासला, वरसगाव, पानशेत तसेच पवना या धरण परिसरातील अतिक्रमणे काढण्यासाठी सर्व्हे सुरू आहे. सध्या पावसाळा सुरू असून, पावसाने विश्रांती दिल्यानंतर खडकवासला धरण प्रकल्पातील अतिक्रमणाबाबत पुन्हा सर्व्हेक्षण सुरू केले जाईल. त्यानंतर धरणातील अतिक्रमणे काढण्याची कारवाई करण्यात येईल, अशी माहिती मुख्य अभियंत्यांनी विखे पाटील यांना दिली.
धरण प्रकल्पातील अतिक्रमणाचे सर्व्हे तातडीने पूर्ण करा. पुण्यासह पश्चिम महाराष्ट्रातील सातारा, सांगली, कोल्हापूर, सोलापूर, या कृष्णा खोरे विकास महामंडळांतर्गत एक हजार १६ धरणांच्या कालव्यातील, कालवा लगत तसेच शहरातील अतिक्रमणे काढण्याची कारवाई करण्यात यावी, असेही विखे पाटील म्हणाले.
-----------