माजी सैनिकाच्या घरात घुसून टोळक्याचा गोंधळ

पुणे, ता. २८ : कारगिल युद्धात लढलेल्या एका माजी सैनिकाच्या घरात मध्यरात्री घुसून गोंधळ घालून आक्षेपार्ह शब्दांचा वापर करीत कुटुंबीयांवर दबाव निर्माण केला, अशी तक्रार माजी सैनिकाच्या भावाने चंदननगर पोलिस ठाण्यात केली आहे. ही घटना शुक्रवारी (ता. २६) मध्यरात्री खराडीतील चंदननगर येथे घडली. याबाबत शमशाद अली शेख यांनी तक्रार दिली आहे. याबाबत अद्याप गुन्हा दाखल नाही. त्यांचे आजोबा व चुलते भारतीय सैन्य दलामध्ये आपली सेवा बजावत निवृत्त झाले आहेत.
कुटुंबीयांनी दिलेल्या माहितीनुसार, एका टोळक्याने रात्री बारा वाजता घरात घुसून गोंधळ घालून, तुम्ही रोहिंग्या बांगलादेशी आहात, अशा आक्षेपार्ह शब्दांचा वापर केला. तुम्ही इथून निघून जा, असा दबाव कुटुंबीयांवर आणला. घरातील एकाला झोपेतून उठून आधार कार्ड मागितले आणि शिवीगाळ केली.
नॅशनल मायनॉरिटी फोरमचे अध्यक्ष राहुल डंबाळे यांनी संबंधित कुटुंबाची भेट घेतली. त्यानंतर पोलिस उपायुक्तांशी संपर्क साधून कारवाईची मागणी केली. ते म्हणाले, ‘‘अलीकडच्या काळात धार्मिक द्वेष वाढवणाऱ्या घटना वाढल्या आहेत. पुणे पोलिस आयुक्तांनी याला वेळीच आवर घालावा.’’
—---------
‘‘शहरातील काही संघटनांचे कार्यकर्ते चंदननगरमध्ये रात्री जमल्याची माहिती मिळाल्यानंतर त्या जागेवर पोलिस पाठवले. खबरदारी म्हणून संबंधित कुटुंबीयांना पोलिस ठाण्यात आणून आधारकार्ड तपासले. रात्री दीडला त्यांना घरी पाठवले. घोषणा देणाऱ्या संघटनांच्या पदाधिकाऱ्यांना पुन्हा असे न करण्याची समज दिली आहे. अद्याप गुन्हा दाखल केलेला नाही.
- सीमा ढाकणे, वरिष्ठ पोलिस निरीक्षक