अनधिकृत इमारतींवर कोंढव्यात ‘हातोडा’ कोंढव्यात अनधिकृत इमारतींवर महापालिकेकडून कारवाईचा बडगा

पुणे, ता. ३० ः कोंढव्यातील अनधिकृत बांधकामांवर महापालिकेने बुधवारी कारवाईचा बडगा उगारला. महापालिकेच्या बांधकाम विभागाने ३ हजार ८०० चौरस फूट बांधकाम जमीनदोस्त केले.
कोंढवा परिसरामध्ये मोठ्या प्रमाणात अनधिकृत बांधकाम सुरू असल्याची माहिती महापालिकेच्या बांधकाम विभागास मिळाली होती. त्यानुसार, बांधकाम विभागाकडून कोंढवा परिसरातील अनधिकृत बांधकामावर कारवाई करण्यात येत होती. बांधकाम विभागाकडून अनधिकृत बांधकामांवर कारवाई, त्यांच्याविरुद्ध गुन्हे दाखल करणे यासाठी ४० अभियंत्यांची नियुक्ती करण्यात आली आहे. त्यांच्याद्वारे अनधिकृत बांधकामे शोधून ते पाडण्याचे काम सुरू आहे.
कोंढव्यातील मलिकनगर परिसरातील सर्व्हे क्रमांक ४६ मधील एका चार मजली बांधकामावर, तर साईबाबा नगरमधील सर्व्हे क्रमांक ६२ मधील तीन मजली बांधकाम पाडण्यात आले. या कारवाईमध्ये सुमारे ३ हजार ८००चौरस फुटाचे बांधकाम जमीनदोस्त करण्यात आले. संबंधित अनधिकृत बांधकाम कारवाईमुळे धोकादायक झालेले आहे. त्याचा कोणी वापर करू नये किंवा संबंधित इमारतीमधील सदनिका कोणी घेऊ नये, असे आवाहन महापालिकेतर्फे करण्यात आले आहे. ही कारवाई शहर अभियंता प्रशांत वाघमारे व अधीक्षक अभियंता राजेश बनकर यांच्या मार्गदर्शनाखाली करण्यात आली.
---------------
कोंढव्यात ७० अनधिकृत बांधकामे
महापालिकेने केलेल्या सर्वेक्षणात ७० ते ८० अनधिकृत बांधकामे असल्याची माहिती पुढे आली होती. काही इमारतींमध्ये नागरिक वास्तव्यास आले आहेत. अशा इमारतींना नोटीस बजावून त्या खाली करण्यासाठी पोलिसांची मदत घेतली जाणार आहे. सध्या सुरु असलेली अनधिकृत बांधकामे पाडण्यात येणार आहेत. या कारवाईवेळी संबंधितांविरुद्ध गुन्हे दाखल करण्यासाठी ४० अभियंत्यांची नियुक्ती करण्यात आली आहे.