अवती भवती

अवती भवती
--------
पुणे, ता. ३० : नागपंचमीच्या निमित्ताने श्री दत्तभक्त मित्र परिवाराच्या वतीने गणेश पेठेतील ऐतिहासिक दगडी नागोबा मंदिरात सन्मान सोहळ्याचे आयोजन करण्यात आले होते. या सोहळ्यात देवस्थानचे विश्वस्त संतोष कडेकर यांचे हस्ते नारायणपूर येथील सर्पमित्र संकेत बोरकर यांचा विशेष सन्मान करण्यात आला. बोरकर यांनी २० हजाराहून अधिक सापांना जीवनदान दिले असून गेल्या १७ वर्षांपासून ते हे कार्य समाजसेवा म्हणून करीत आहे. सन्मानचिन्ह, शाल, श्रीफळ असे सन्मानाचे स्वरूप होते. कार्यक्रमाचे संयोजन राम दहाड यांनी केले. यावेळी सुरेश कर्डीले, किशोर ईप्पे, महेश गायकवाड उपस्थित होते. बोरकर म्हणाले, साप पकडताना लक्षपूर्वक काम केले पाहिजे. सर्पमित्र म्हणून आमची नोंदणी आहे. मात्र, सरकारने आम्हाला सुविधा द्यायला हव्या. आम्हाला दुखापत झाली, तर रुग्णालयात सुविधा द्यायला हव्या. मानधन व रुग्णालयात शासनाकडून खर्च मिळावा, अशी अपेक्षा त्यांनी व्यक्त केली.
.........
पुणे, ता. ३० : शुक्रवार पेठेतील अखिल म्हसोबा उत्सव मंडई ट्रस्टचा म्हसोबा उत्सव महात्मा फुले मंडई, बुरूड आळी येथे आयोजित केला होता. त्यामध्ये दिव्यांग प्रतिष्ठान चिंचवडगाव, सुकन्या अंध मुलांचे महिलाश्रम, यशस्वी महिला सामाजिक संस्था या तीन संस्थांना ५१ हजार रुपयांची आर्थिक मदत देण्यात आली. कार्यक्रमाला सहपोलिस आयुक्त रंजनकुमार शर्मा, पोलिस निरीक्षक अरुण घोडके, ट्रस्टचे विश्वस्त अध्यक्ष राहुल सूर्यवंशी, विश्वस्त उपाध्यक्ष निवृत्ती जाधव उपस्थित होते. वेंकीज उद्योग समूहाचे संचालक बालाजी राव आणि उद्योजक प्रकाश धारिवाल यांनी मार्गदर्शन केले.
..........
पुणे, ता. ३० : लायन्स क्लब ऑफ पूना शिवाजीनगरच्या पदग्रहण समारंभात मिटकॉनचे संचालक व कौशल्य विकास तज्ञ डॉ. गणेश खामगळ यांची अध्यक्षपदी नियुक्ती करण्यात आली. जितेंद्र मेहता यांच्या हस्ते त्यांना नियुक्तीपत्र देण्यात दिले.
सचिव स्वप्नील बचुटे आणि कोषाध्यक्ष स्नेहल मांडवकर यांची नियुक्ती करण्यात आली. त्यानंतर विविध उपक्रम राबविण्यात आले. यात सायबर तज्ञ डॉ. शिरीष देशपांडे यांनी सायबर सुरक्षा जनजागृती अभियान, दृष्टिहीन विद्यार्थ्याचा विशेष प्रावीण्याबद्दल गौरव तसेच कोथरूड अंधशाळा, मातोश्री वृद्धाश्रम, सोफोश आणि मतिमंद मुलांच्या शाळेला आर्थिक मदतीचा हाथ देण्यात आला. याप्रसंगी माजी प्रांतपाल डॉ. ज्योती तोष्णीवाल, क्लबचे संस्थापक डॉ. अनिल तोष्णीवाल, माजी परिषद कोषाध्यक्ष शरदचंद्र पाटणकर आदी उपस्थित होते.
...........