अवती भवती

संकेत बोरकर यांचा
विशेष सन्मान
पुणे, ता. ३० ः नागपंचमीच्या निमित्ताने श्री दत्तभक्त मित्र परिवाराच्यावतीने गणेश पेठेतील ऐतिहासिक दगडी नागोबा मंदिरात सन्मान सोहळ्याचे आयोजन करण्यात आले होते. या सोहळ्यात देवस्थानचे विश्वस्त संतोष कडेकर यांचे हस्ते नारायणपूर येथील सर्पमित्र संकेत बोरकर यांचा विशेष सन्मान करण्यात आला. बोरकर यांनी २० हजाराहून अधिक सापांना जीवनदान दिले असून, गेल्या १७ वर्षांपासून ते हे कार्य समाजसेवा म्हणून करीत आहे. सन्मानचिन्ह, शाल, श्रीफळ असे सन्मानाचे स्वरूप होते. कार्यक्रमाचे संयोजन राम दहाड यांनी केले. यावेळी सुरेश कर्डिले, किशोर ईप्पे, महेश गायकवाड उपस्थित होते. बोरकर म्हणाले, ‘‘साप पकडताना लक्षपूर्वक काम केले पाहिजे. सर्पमित्र म्हणून आमची नोंदणी आहे. मात्र, सरकारने आम्हाला सुविधा द्यायला हव्या. आम्हाला दुखापत झाली, तर रुग्णालयात सुविधा द्यायला हव्या. मानधन व रुग्णालयात शासनाकडून खर्च मिळावा.’’

अध्यक्षपदी डॉ. गणेश खामगळ
पुणे, ता. ३० : लायन्स क्लब ऑफ पूना शिवाजीनगरच्या पदग्रहण समारंभात ‘मिटकॉन’चे संचालक व कौशल्य विकास तज्ज्ञ डॉ. गणेश खामगळ यांची अध्यक्षपदी नियुक्ती करण्यात आली. जितेंद्र मेहता यांच्या हस्ते त्यांना नियुक्तीपत्र देण्यात दिले.
सचिव स्वप्नील बचुटे आणि कोषाध्यक्ष स्नेहल मांडवकर यांची नियुक्ती करण्यात आली. त्यानंतर विविध उपक्रम राबविण्यात आले. यात सायबर तज्ज्ञ डॉ. शिरीष देशपांडे यांनी सायबर सुरक्षा जनजागृती अभियान, दृष्टिहीन विद्यार्थ्यांचा विशेष प्रावीण्याबद्दल गौरव तसेच कोथरूड अंधशाळा, मातोश्री वृद्धाश्रम, सोफोश आणि मतिमंद मुलांच्या शाळेला आर्थिक मदतीचा हाथ देण्यात आला. याप्रसंगी माजी प्रांतपाल डॉ. ज्योती तोष्णीवाल, क्लबचे संस्थापक डॉ. अनिल तोष्णीवाल, माजी परिषद कोषाध्यक्ष शरदचंद्र पाटणकर आदी उपस्थित होते.
...........