कंत्राटी कामगारांची फसवणूक टाळण्यासाठी प्रशासन सतर्क

पुणे, ता. ३० ः क्षेत्रीय कार्यालय स्तरावर झाडणकामासाठी कंत्राटी कामगार घेताना मुकादम, आरोग्य निरीक्षक संगनमताने या कामगारांकडून नोकरीवर लावण्यासाठी पैसे घेत असल्याचे प्रकार समोर आले आहेत. त्यामुळे सतर्क झालेल्या प्रशासनाने हे प्रकार टाळण्यासाठी कंत्राटी कामगारांना कामावर घेण्यासाठी पैसे घेतले जात नाहीत, कोणत्याही गरजवंत कामगाराने आमिषाला बळी पडून पैसे देऊ नयेत, असे आवाहन केले आहे. कंत्राटी कामगारांकडून पैसे घेतले जात असल्याचा प्रकार ‘सकाळ’ने उघडकीस आणला होता.
पुणे महापालिकेतर्फे शहरातील रस्ते, सार्वजनिक जागा झाडण्यासाठी कंत्राटी कामगार घेतले जातात. त्यासाठी प्रत्येक क्षेत्रीय कार्यालयनिहाय एका वर्षासाठी निविदा काढली जाते. क्षेत्रीय कार्यालय स्तरावर आरोग्य निरीक्षकांच्या आशीर्वादाने काही मुकादम कंत्राटी कामगारांना कामाला लावण्यासाठी त्यांच्याकडून २० हजार ते एक लाख रुपये अशी रक्कम घेत आहेत. ‘सकाळ’ने या प्रकरणाचा पर्दाफाश करत सिंहगड रस्ता क्षेत्रीय कार्यालयातील प्रकार समोर आणला. यामध्ये चौकशी होऊन मुकादम महिलेला सेवेतून निलंबन करून तिची विभागीय चौकशी सुरू झाली आहे. तर आरोग्य निरीक्षकाकडील पावती पुस्तकात अनियमितता दिसून आल्‍याने त्यांचीही चौकशी सुरू झाली आहे.
कंत्राटी कामगारांना आधीच पगार कमी असतो, त्यात त्यांच्या अज्ञानाचा गैरफायदा घेत महापालिकेतील कायम सेवेतील मुकादम, आरोग्य निरीक्षक त्यांची आर्थिक पिळवणूक करत आहेत. तसेच काही खासगी एजंटही कायम नोकरी लावून देण्याच्या आमिषाने फसवणूक केली जात आहे. याबाबत प्रशासनाकडे तक्रारी दाखल झाल्या आहेत. त्यावर घनकचरा विभागाचे उपायुक्त संदीप कदम यांनी परिपत्रक काढले असून, त्यात क्षेत्रीय कार्यालयाचे सहाय्यक आयुक्त, परिमंडळ उपायुक्त यांना हे प्रकार टाळण्यासाठी जाहीर नोटीस माहिती फलकावर लावावी, कर्मचाऱ्यांमध्ये ही माहिती द्यावी, अशी सूचना केली आहे. कंत्राटी कामगारांची नोकरीच्या आमिषाने फसवणूक होणार नाही याची काळजी घेण्याचे आवाहन कदम यांनी केले आहे.