मानवी तस्करीविरोधात एकजूट आवश्यक ः डॉ. गोऱ्हे

पुणे, ता.३० ः ‘‘मानवी तस्करीसारख्या गुन्ह्यांना आळा घालण्यासाठी स्थानिक यंत्रणा, पोलिस, स्वयंसेवी संस्था आणि जनतेने एकत्र येऊन जनजागृती करत, लोकचळवळ तयार करावी. मानवी तस्करीविरोधातील लढ्यासाठी समाजातील सर्व घटकांनी कृतिशील सहभाग घ्यावा, ही केवळ भावना नाही तर काळाची गरज आहे,’’ असे प्रतिपादन विधान परिषदेच्या उपसभापती डॉ. नीलम गोऱ्हे यांनी केले.
जागतिक मानवी तस्करीविरोधी दिनानिमित्त राज्य महिला आयोगामार्फत ‘संवेदनशीलता ते संकल्प : शोषणाविरोधात लढा’ या कृतीशाळेचे आयोजन करण्यात आले होते. यावेळी पशुसंवर्धन मंत्री पंकजा मुंडे, महिला व बालविकास मंत्री अदिती तटकरे, गृह निर्माण राज्यमंत्री पंकज भोयर, महिला व बालविकास राज्यमंत्री मेघना बोर्डीकर, आमदार प्रज्ञा सातव, श्रीजया चव्हाण, मनिषा कायंदे, हारून खान, सना मलिक, मोनिका राजाळे आणि आयोगाच्या सदस्य सचिव नंदिनी आवाडे आदी उपस्थित होते. यावेळी विदर्भातील व्यावसायिक लैंगिक शोषण अन्वेषण अहवाल आणि ‘समस्या, मदत, कायदे काय सांगतात’ या पुस्तिकेचे अनावरण करण्यात आले.
डॉ. गोऱ्हे म्हणाल्या, ‘‘महिलांनी आत्मसंरक्षणासाठी सजग व सक्षम होणे अत्यंत गरजेचे आहे. शासन या लढ्यात त्यांच्या पाठीशी ठामपणे उभे आहे. तस्करीविरोधातील लढ्यात तंत्रज्ञानाचा वापर करून दोषसिद्धी वाढवणे शक्य आहे. प्रत्येक जिल्ह्याने शाश्वत विकास उद्दिष्टे यानुसार तीन टक्के निधी यासाठी वापरण्याचे निर्देशही देण्यात आले आहेत.’’