आरटीओ निरीक्षकाचे पुरावे मुख्यमंत्र्यांना सादर अनिल परब यांनी घेतली मुख्यमंत्र्यांची भेट ः कारवाईचे आश्वासन

पुणे, ता. ३१ ः खासगी चालकाला सरकारी गणवेश व सरकारी वाहन उपलब्ध करून देत आपल्या पदाचा गैरवापर करीत वाहनचालकांकडून बेकायदेशीरपणे ‘वसुली’ केल्याचा ठपका मोटार वाहन निरीक्षक सचिन पाटील यांच्यावर ठेवण्यात आला. याचे पडसाद पावसाळी अधिवेशनात उमटले. शिवसेना उद्धव बाळासाहेब ठाकरे पक्षाचे नेते अनिल परब यांनी तारांकित प्रश्न मांडून परिवहन विभागाचे धिंडवडे काढले होते. अनिल परब यांनी मुख्यमंत्री देवेंद्र फडणवीस यांची भेट घेऊन सचिन पाटील यांच्या विरोधातील सर्व पुरावे सादर केले. या प्रकरणी मुख्यमंत्र्यांकडून कारवाईचे आश्वासन मिळाले असल्याचे परब यांनी सांगितले.
सचिन पाटील हे परिवहन आयुक्तालयाच्या वायुवेग पथकात निरीक्षक म्हणून काम करतात. त्यांनी कोट्यवधी रुपयांची बेकायदेशीर वसुली केल्याचा आरोप त्यांच्यावर आहे. तर हे प्रकरण दडपण्याचा प्रकार परिवहन विभागातील वरिष्ठ अधिकाऱ्यांमार्फत सुरु आहे. घटनेला सुमारे दोन महिने झाले. मात्र, अद्याप परिवहन विभागाने सचिन पाटील यांच्यावर कोणतीच कारवाई केलेली नाही. परिवहन मंत्री प्रताप सरनाईक यांनी देखील अहवालाचा हवाला देत आपली भूमिका गुलदस्त्यात ठेवली आहे. त्यामुळे सचिन पाटीलवर खरंच कारवाई होणार का ? हा प्रश्न अनुत्तरित राहत आहे.
----------
काय आहे प्रकरण?
सचिन पाटील या निरीक्षकाच्या खासगी वाहनावर चालक असलेली व्यक्ती मुंबईतील देवनार परिसरात जड वाहतूक करणाऱ्या वाहनचालकांकडून वसुली करीत होता. हातात ‘चलान’ची मशिन घेऊन फिरत होता. कारवाई टाळण्यासाठी वाहनचालकांकडून मोठ्या प्रमाणात वसुली सुरू होती. हा प्रकार सुरू असताना सचिन पाटील हा गाडीत बसून याला मूकसंमती देत असल्याचा व्हिडिओ समाजमाध्यमांवर प्रसिद्ध झाला.
------------------
‘‘विधानपरिषदेत भ्रष्ट निरीक्षक सचिन पाटील यांच्या संदर्भात प्रश्न उपस्थित केल्यानंतर मुख्यमंत्र्यांनी पुरावे सादर करण्यासंदर्भात सांगितले होते. त्यानुसार मी मुख्यमंत्री देवेंद्र फडणवीस यांची भेट घेऊन माझ्याजवळचे सर्व पुरावे सादर केले आहेत. मुख्यमंत्री त्याची दखल घेऊन योग्य ती कारवाई करतील, अशी अपेक्षा आहे.
अनिल परब, नेते, शिवसेना उद्धव बाळासाहेब ठाकरे पक्ष.