गायीच्या दूध खरेदी दरात एक रुपयांची वाढ पुणे जिल्हा दूध उत्पादक संघाचा निर्णय

पुणे, ता. ३१ : इंधन दरवाढ, पशुखाद्याचे वाढते दर आणि दूध उत्पादनात घट अशा संकटग्रस्त परिस्थितीत असलेल्या दूध उत्पादक शेतकऱ्यांना दिलासा देत पुणे जिल्हा सहकारी दूध उत्पादक संघाने गायीच्या दुधाच्या खरेदी दरात प्रति लिटर एक रुपयांची वाढ करण्याचा निर्णय घेतला आहे. हा निर्णय ३१ जुलैच्या मध्यरात्रीपासून अमलात येणार असून, विक्रीदरात मात्र कोणतीही वाढ करण्यात आलेली नाही.
गाय दूध (३.५ फॅट व ८.५ एसएनएफ) खरेदी दरात वाढ करत संघाने शेतकऱ्यांच्या अडचणी ओळखून सकारात्मक निर्णय घेतला आहे. एक ऑगस्ट २०२५ पासून नव्या दरानुसार दूध खरेदी किंमत प्रति लिटर ३३ रुपये, तर संस्थांसाठी वरकड खर्चासह दर ३३.८० रुपये इतका निश्चित करण्यात आला आहे.
या दरवाढीमुळे संघावर आर्थिक ताण येणार असला तरीही शेतकऱ्यांच्या कल्याणासाठी विक्रीदरात कोणतीही वाढ केली जाणार नाही. त्यामुळे ग्राहकांवर अतिरिक्त भार न येता शेतकऱ्यांना प्रत्यक्ष फायदा होणार आहे. शेतकऱ्यांनी स्वच्छ, ताजे, भेसळविरहित आणि उच्च गुणवत्तेचे दूध अधिकाधिक प्रमाणात पुरवठा करावे, असे आवाहन पुणे जिल्हा दूध संघाचे व्यवस्थापकीय संचालक मनोज लिमये यांनी केले आहे.
------