नारायण पेठेतील जुगार अड्ड्यावर छापा सहाय्यक फौजदार निलंबित, ३२ जणांविरोधात गुन्हा

पुणे, ता. १ : नारायण पेठेतील महापालिकेच्या वाहनतळामधील जुगार अड्ड्यावर गुरुवारी रात्री विश्रामबाग पोलिसांनी छापा टाकून मोठी कारवाई केली. याप्रकरणी ३२ जणांविरोधात जुगार प्रतिबंधक कायद्यान्वये गुन्हा दाखल केला असून, जुगार खेळताना आढळलेल्या एका सहाय्यक फौजदारास निलंबित करण्यात आले आहे.
विश्रामबाग पोलिसांनी या कारवाईत एक लाख ६९ हजारांची रोकड, २५ मोबाईल फोन, पत्त्यांचे कॅट असा एकूण चार लाख ९३ हजारांचा मुद्देमाल जप्त केला आहे. पोलिसांनी दिलेल्या माहितीनुसार, नारायण पेठेतील मोदी गणपतीजवळ महापालिकेचे ‘क्रीडामहर्षी हरिभाऊ साने वाहनतळ’ आहे. हे वाहनतळ खासगी ठेकेदारामार्फत चालवण्यास दिले आहे. मात्र, येथे पत्त्याचा जुगार सुरू असल्याची माहिती विश्रामबाग पोलिसांना मिळताच गुरुवारी रात्री छापा टाकला. या ठिकाणी शहरातील सदाशिव पेठ, नारायण पेठ, गुरुवार पेठ, कात्रज, मार्केट यार्ड, सहकारनगर, बिबवेवाडी, पाषाण, मांजरी, कोंढवा, नऱ्हे, सिंहगड रस्ता, कोरेगाव पार्क, एरंडवणे आदी भागातील काही जण जुगार खेळताना आढळून आले. त्यात काही व्यापारीही असल्याचे समोर आले आहे. ही कारवाई परिमंडळ एकचे पोलिस उपायुक्त कृषिकेश रावले यांच्या मार्गदर्शनाखाली विश्रामबाग ठाण्याचे पोलिस निरीक्षक (गुन्हे) अरुण घोडके, सहाय्यक निरीक्षक राजेश उसगावकर आणि त्यांच्या पथकाने केली.
या छाप्यात पोलिस मुख्यालयातील सहाय्यक फौजदार महेश भुतकर हे जुगार खेळताना आढळून आले. संबंधित फौजदाराविरोधात तत्काळ निलंबनाची कारवाई करण्यात आली आहे. पोलिस उपायुक्त (मुख्यालय) राजलक्ष्मी शिवणकर यांनी ही कारवाई केली.
--------