जलविमानाच्या उड्डाणासाठी सर्वेक्षण सुरु खासगी संस्थेकडून व्यवहार्यता तपासणी, तीन महिन्यात अहवाल तयार होणार

प्रसाद कानडे : सकाळ वृत्तसेवा
पुणे, ता. २४ ः पुण्यासह राज्यातील ८ ठिकाणाहून जलविमान (सी प्लेन) सुरु करण्याच्या हालचाली सुरु झाल्या आहेत. महाराष्ट्र विमानतळ विकास कंपनीच्यावतीने (एमएडीसी) राज्यातील ८ जलाशयांवर जल-हवाई तळ (वॉटर ऐरोड्रोम) तयार करण्यासंदर्भात सध्या खासगी संस्थेच्या वतीने सर्वेक्षण सुरु आहे. येत्या तीन महिन्यात हे सर्वेक्षण पूर्ण होईल. त्यातून कोणत्या जलाशयावरून विमानसेवा सुरु करणे शक्य असेल, हे स्पष्ट होणार आहे.
हवाई वाहतूक मंत्रालयाच्या ‘उडान’ ५.५ च्या योजनेत हेलिकॉप्टर व सी प्लेनचा देखील समावेश करण्यात आला. येत्या काळात हेलिकॉप्टर सेवेचा अधिक विस्तार होणार आहे. देशात सी प्लेनचा देखील वापर वाढणार आहे. हे लक्षात घेता देशात डिसेंबरअखेर १५० मार्गावर सी प्लेनची सेवा सुरु करण्याचा प्रस्ताव आहे. शिवाय ‘एमएडीसी’ने देखील राज्यातील ८ ठिकाणांहून ‘सी प्लेन’ची सेवा सुरु करण्याचा प्रस्ताव भारतीय विमानतळ प्राधिकरण व हवाई वाहतूक मंत्रालय यांना सादर केला आहे. यात पुणे जिल्ह्यातील पवना धरणाचा समावेश आहे.
-----------------------
नदी अथवा सरोवर येथून उड्डाण
विमान जिथे पाण्यावर उड्डाण अथवा लँडिंग करू शकते. त्याला जलविमान असे म्हणतात. (नदी, तलाव, समुद्र, सरोवर, अथवा एखादे जलाशय) भारतात अनेक ठिकाणी नदी, सरोवर व समुद्रकिनारे आहेत पण विमानतळ नाहीत, तिथे सी-प्लेन सेवा उपयुक्त ठरते. यासाठी वापरले जाणारे विमान हे १९ ते ९० आसने असतात.
----------------
राज्यातील ८ ठिकाणांचा समावेश :
- धोम धरण ( वाई)
- गंगापूर धरण (नाशिक )
- खिंडसी धरण (नागपूर)
- कोराडी धरण (मेहकर)
- पवना धरण (पवनानगर, मावळ)
- पेंच धरण (पारशिवनी, नागपूर)
- गणपतीपुळे (रत्नागिरी)
- रत्नागिरी
---------------------
‘‘महाराष्ट्रातून जलविमानाची सेवा सुरु व्हावी, यासाठी प्रस्तावित आठ ठिकाणच्या ‘वॉटर एअरड्रोम’चे सर्वेक्षण सुरु झाले आहे. तीन महिन्यात याचा अहवाल प्राप्त होईल. त्यानंतरच कोणत्या ठिकाणाहून विमानसेवा सुरु होणे शक्य आहे, हे समजेल.
-स्वाती पांडे, उपाध्यक्ष व व्यवस्थापकीय संचालक, एमएडीसी, मुंबई.