‘भावगंधर्वां’ची संगीतयात्रा उलगडणार

पुणे, ता. २ : ‘गगन सदन’, ‘केव्हातरी पहाटे’, ‘मी रात टाकली’, ‘मी डोलकर’, ‘आनंदवन भुवनी’ अशा मराठीजनांचे भावविश्व समृद्ध करणाऱ्या भावगीतांची पर्वणी पुणेकरांना मिळणार आहे. निमित्त आहे, ‘सकाळ माध्यम समूहा’तर्फे आयोजित ‘नक्षत्रांचे देणे- पं. हृदयनाथ मंगेशकर’ या कार्यक्रमाचे.
हा कार्यक्रम २३ ऑगस्टला सायंकाळी ६.३० वाजता कर्वेनगरच्या डीपी रस्त्यावरील पंडित फार्म येथे सादर होणार आहे. या कार्यक्रमाची संकल्पना आणि सादरीकरण ‘इंडियन मॅजिक आय’ यांचे आहे. ‘लोकमान्य मल्टिपर्पज को-ऑप सोसायटी लि.’ हे या कार्यक्रमाचे सहयोगी प्रायोजक आहेत.
हृदयनाथ मंगेशकर यांनी संतकवींच्या रचना आणि अभंग गीतांच्या स्वरूपात आणून संतांचे विचार मराठी भावविश्वात कायमचे रुजवले. प्रतिभावान कवींच्या काव्याचे मोल ओळखून, मर्म जाणून त्या कविता, त्यांच्या भाव आणि व्यामिश्रतेसह रसिकांच्या मनात उतरवल्या. त्यांनी संगीतबद्ध केलेली अजरामर गीते या कार्यक्रमात ऐकायला मिळणार असून या गीतांच्या निर्मितीमागची प्रेरणा, काही अपरिचित किस्सेही उलगडणार आहेत.
या कार्यक्रमाची तिकीटविक्री सुरू झाली असून, www.ticketkhidakee.com आणि www.bookmyshow.com या संकेतस्थळांवर किंवा बातमीसोबत दिलेल्या क्यूआर कोडद्वारे तिकिटे आरक्षित करता येणार असल्याचे ‘सकाळ माध्यम समूहा’ने सांगितले आहे.

पं. हृदयनाथ मंगेशकर सहभागी होणार
‘नक्षत्रांचे देणे- पं. हृदयनाथ मंगेशकर’ ही या कार्यक्रमाची संकल्पना आणि दिग्दर्शन श्रीरंग गोडबोले यांचे आहे. रवींद्र साठे, अजित परब, विभावरी आपटे, मधुरा दातार, सचिन इंगळे आदी कलाकार हा कार्यक्रम सादर करणार आहेत. विशेष म्हणजे स्वतः पं. हृदयनाथ मंगेशकरदेखील या कार्यक्रमात सहभागी होणार आहेत.

‘नक्षत्रांचे देणे - हृदयनाथ मंगेशकर’
कधी : २३ ऑगस्ट
केव्हा : सायंकाळी ६.३० वाजता
कुठे : पंडित फार्म, डीपी रस्ता, कर्वेनगर