व्यवस्थापन कोट्याच्या नावाखाली लुट

पुणे, ता. २ : पुण्यातील नामांकित महाविद्यालयात अभियांत्रिकी अभ्यासक्रमासाठी आपल्या मुलीला प्रवेश मिळावा, म्हणून पालक अरुण काळे (नाव बदलले आहे) यांनी संबंधित महाविद्यालय गाठले. महाविद्यालयात व्यवस्थापन कोट्याद्वारे प्रवेशासाठी आतापासून नावे लिहून घेतली जात असल्याने काळे यांनी देखील आपल्या मुलीचे नाव नोंदवहीमध्ये नोंदविले. दरम्यान, संबंधित महाविद्यालयाने थेट महाविद्यालयाच्या शुल्काच्या तिप्पट शुल्क मागितले. हवालदिल झालेल्या काळे यांनी पुन्हा गावाकडचा रस्ता धरला.

काळे यांच्याप्रमाणेच व्यवस्थापन कोट्यातून व्यावसायिक अभ्यासक्रमांना विशेषत: अभियांत्रिकी अभ्यासक्रमांना आपल्या पाल्याचे प्रवेश घेऊन पाहणाऱ्या पालकांना अशाप्रकारचा अनुभव येत आहे. राज्यात शुल्क नियामक प्राधिकरणाची बैठक २४ एप्रिल २०२५ रोजी झाली. या बैठकीत प्राधिकरणाने शैक्षणिक वर्ष २०२५-२६ पासून वैद्यकीय शिक्षण विभाग, उच्च व तंत्र शिक्षण, कृषी आणि उच्च शिक्षण या विभागाअंतर्गत येणाऱ्या पदवी आणि पदव्युत्तर अभ्यासक्रमासाठी प्रवेश घेणाऱ्या विद्यार्थ्यांना व्यवस्थापन कोट्यासाठी तीन पट इतक्या कमाल मर्यादेपर्यंत शुल्क आणि अनिवासी भारतीय कोट्याकरिता येणाऱ्या सर्व पदवी आणि पदव्युत्तर अभ्यासक्रमासाठी पाच पट इतक्या कमाल मर्यादेपर्यंत शुल्क लागू करण्याचा निर्णय घेतला आहे. खरंतर, संबंधित संस्था या कमाल मर्यादेपेक्षा कमी शुल्क आकारणी करू शकतात, असे प्राधिकरणाने बैठकीच्या इतिवृत्तात स्पष्टपणे नमूद केले आहे.
परंतु, सावित्रीबाई फुले पुणे विद्यापीठाशी संलग्न शहरातील नामांकित संस्थांना व्यवस्थापन कोट्याअंतर्गत प्रवेश प्रक्रिया राबविताना शुल्क नियामक प्राधिकरणाच्या बैठकीच्या इतिवृत्तात ‘संस्था या कमाल मर्यादेपेक्षा कमी शुल्क आकारणी करू शकतात’, या सूचनेचा विसर पडल्याचे दिसून येते. इतिवृत्तात दिल्याप्रमाणे आता सरसकट सर्व महाविद्यालये शुल्काच्या तिप्पट शुल्क व्यवस्थापन कोट्यातून अप्रत्यक्षरीत्या अधिकृतपणे आकारत आहे. त्यामुळे व्यवस्थापन कोट्याच्या नावाखाली पालकांची सरसकट लूट सुरू आहे. म्हणूनच शहरातील नामांकित महाविद्यालयांच्या व्यावसायिक पदवी अभ्यासक्रमाच्या व्यवस्थापन कोट्याचे शुल्क गगनाला भिडल्याने पालकांचे आर्थिक गणित बिघडले आहे.

सावित्रीबाई फुले पुणे विद्यापीठाशी संलग्न व्यावसायिक अभ्यासक्रम राबविणाऱ्या महाविद्यालयांनी व्यवस्थापन कोट्याअंतर्गत प्रवेश देताना शुल्क नियामक प्राधिकरणाच्या सुचनेनुसार शुल्क आकारणी करावी. परंतु, प्राधिकरणाच्या इतिवृत्तात नमूद केल्याप्रमाणे सरसकट तिप्पट शुल्क आकारू नये. प्राधिकरणाने स्पष्टपणे म्हटल्यानुसार, ‘संस्था या कमाल मर्यादेपेक्षा कमी शुल्क आकारणी करू शकतात’. विद्यार्थी-पालकांच्या दृष्टीने विचार करून संबंधित महाविद्यालयांनी शुल्क आकारावे.
- डॉ. पराग काळकर,
प्र-कुलगुरू, सावित्रीबाई फुले पुणे विद्यापीठ

पालकांना सल्ला...
- थेट व्यवस्थापन कोट्यात जाण्यापेक्षा पालकांनी ‘कॅप’ फेरीदरम्यान संयम बाळगावा
- विशिष्ट महाविद्यालयातच प्रवेश घेण्याचा आग्रह धरू नये
- विशिष्ट महाविद्यालय, विशिष्ट अभ्यासक्रमाबाबत पालकांनी आग्रह सोडावा

तुमचे मत मांडा..
पुण्यातील नामांकित महाविद्यालयात व्यवस्थापन कोट्याच्या नावाखाली लुट होत आहे. असाच अनुभव तुम्हालाही आला आहे का? याबाबत तुमचे मत मांडा...