बालेवाडीमध्ये ‘ट्रान्झिट हब’ होणार हिंजवडीतील वाहतूक कोंडीवर उतारा ः पीएमपीच्या १० एकर जागेचा प्रस्ताव सादर

पुणे, ता. २ ः माहिती तंत्रज्ञान व औद्योगिक क्षेत्रासाठी ओळखला जाणारा हिंजवडी परिसर सध्या गंभीर अशा वाहतूक कोंडीच्या कचाट्यात अडकला आहे. वाहतूक कोंडीची दखल मुख्यमंत्री देवेंद्र फडणवीस व उपमुख्यमंत्री अजित पवार यांनी घेतल्यानंतर आता स्थानिक प्रशासन देखील कामाला लागले आहे. पीएमपी प्रशासनाने नुकतेच या भागाचे सर्वेक्षण करून, बालेवाडी येथील आगाराजवळील सुमारे १० एकर जागा व वाकड जकात नाक्याची काही जागा ‘ट्रान्झिट हब’साठी उपलब्ध करून देण्यास पीएमपी प्रशासनाने सहमती दर्शवली आहे. तसा प्रस्ताव देखील विभागीय आयुक्तांना पाठविला आहे. या ठिकाणी जड व मोठ्या वाहनांचे पार्किंग होणार आहे.
हिंजवडी, वाकड या भागातील वाहतूक कोंडी सोडविण्यासाठी प्रशासनाकडून काही महत्त्वाचे पाऊल उचलण्यात येत आहे. यात या ‘ट्रान्झिट हब’चा देखील पर्याय समोर आला आहे. पीएमपी प्रशासनाने वाहतूक कोंडीच्या कारणांचा शोध घेऊन, काही प्रमाणात उपाय देखील सुचविले आहेत. ‘ट्रान्झिट हब’मध्ये मुंबईकडे जाणारी वाहने ही वाकड जकात नाका येथे पार्किंग केले जातील तर कोल्हापूरला जाणारी वाहने हे बालेवाडी आगार जवळच्या जागेत थांबविण्याचे प्रस्तावात म्हटले आहे. सध्या ही वाहने रस्त्याच्या बाजूलाच बेकायदेशीरपणे उभी केली जातात. परिणामी वाहतूक कोंडीत भर पडत आहे.
-------------------
समन्वयातून प्रश्न सुटणार :
पीएमपी प्रशासनाने ‘ट्रान्झिट हब’ चा प्रस्ताव विभागीय आयुक्तांकडे सादर केला आहे. लवकरच पिंपरी-चिंचवड महापालिका पीएमआरडीए यांना या संदर्भात सूचना दिल्या जाण्याची शक्यता आहे. ‘ट्रान्झिट हब’चा खर्च या दोन्ही संस्थेच्या माध्यमातून केली जाण्याची शक्यता आहे. समन्वयातून एकत्रित निर्णय होऊन प्रत्यक्ष कामाला गती मिळण्याची अपेक्षा आहे.
----------------
वाहतूक कोंडीवर प्रभावी उपाय :
हिंजवडी परिसरातील म्हाळुंगे, वाकड, बाणेर, बालेवाडी मार्गावर मोठ्या प्रमाणात कोंडी होते. ती कमी करण्याच्या दिशेने एक महत्त्वाचे पाऊल टाकण्यात आले आहे. ट्रान्झिट हबमुळे या भागातील प्रवासाचा वेळ वाचण्याची शक्यता अधिक आहे.
---------
‘‘पीएमपी प्रशासनाने या भागात होणाऱ्या वाहतूक कोंडीचे सर्वेक्षण करून ‘ट्रान्झिट हब’चा पर्याय व त्यासाठी सहमती दर्शवली आहे. तसा प्रस्ताव विभागीय आयुक्तांना दिला आहे. शिवाय ज्या ठिकणी थांबे आहेत, ते तिथून स्थलांतरित करण्याचा देखील निर्णय घेतला आहे.
- पंकज देवरे, अध्यक्ष व व्यवस्थापकीय संचालक, पीएमपीएमएल, पुणे.