विरोधी पक्षातील नेत्यांना जाणीवपूर्वक लक्ष्य रोहिणी खडसे यांची सरकारवर टीका

पुणे, ता. २ ः ‘‘सरकारच्या विरोधात बोलणाऱ्यांवरच कारवाई करते, हे सगळ्या महाराष्ट्राला माहीत आहे. सरकारकडून विरोधी पक्षातील नेत्यांना जाणीवपूर्वक लक्ष्य केले जात आहे.’’ असा आरोप राष्ट्रवादी कॉंग्रेस शरदचंद्र पवार पक्षाच्या महिला प्रदेशाध्यक्ष रोहिणी खडसे यांनी शनिवारी स्पष्ट केले.
राष्ट्रवादी कॉंग्रेस शरदचंद्र पवार पक्षाचे अध्यक्ष शरद पवार यांच्या पुण्यातील मोदीबाग येथील निवासस्थानी रोहिणी खडसे यांनी शनिवारी भेट घेतली. त्यानंतर त्यांनी माध्यमांशी संवाद साधला. पवार यांच्या भेटीबाबत ‘पक्ष संघटनेबाबतच पवार यांची भेट घेऊन त्यांच्याशी चर्चा केली.’ असे खडसे यांनी सांगितले. पती प्रांजल खेवलकर यांच्यावरील कारवाईबाबत त्या म्हणाल्या, ‘‘पुणे पोलिसांनी विचारलेल्या प्रश्‍नांमध्येच उत्तरे आहेत. सध्या संबंधित प्रकरण न्यायप्रविष्ट असल्याने त्यावर बोलणार नाही. आमच्यावर होणाऱ्या टीकेला योग्य वेळी उत्तर देईल. माझी बाजू योग्य वेळी पत्रकार परिषद घेऊन मांडेन. घराभोवती पाळत ठेवण्याच्या मुद्यावर पाळत ठेवण्याचा हेतू नसल्याचे आता पोलिस म्हणत आहेत.’’
---------------