‘पीएमपी’ची लवकरच भीमाशंकरसाठी बस

पुणे, ता. ३ ः पीएमपी प्रशासन भाविकांसाठी पुण्याहून थेट भीमाशंकरसाठी सेवा सुरू करणार आहे. त्यासाठी सर्वेक्षणदेखील सुरू झाले आहे. स्वारगेटहून भीमाशंकरचे अंतर सुमारे १३४ किलोमीटर असल्याने स्वारगेट-भीमाशंकर-स्वारगेट हे एकूण अंतर सुमारे २६८ किलोमीटर होईल. त्यामुळे या मार्गावर ई-बसची सेवा सुरू होण्याची शक्यता नाही, मात्र सीएनजी बस धावू शकते. मार्गात एकदा बसमध्ये ‘सीएनजी’ भरावे लागणार आहे. ते ठिकाण निवडण्याचे काम सुरू आहे. येत्या काही दिवसांत ते ठिकाण निवडून पीएमपी प्रशासन भीमाशंकरसाठी बससेवा सुरू करणार हे निश्‍चित झाले आहे.
भीमाशंकरला जाणाऱ्या भाविकांची संख्या अधिक आहे. भीमाशंकरला जाण्यासाठी खासगी वाहनांचा अथवा एसटीचा वापर करावा लागतो. एसटी गाड्यांची संख्या तुलनेने कमी आहे. त्यामुळे अनेक भाविक खासगी वाहनाने भीमाशंकर गाठतात. पीएमपी प्रशासनाने थेट भीमाशंकरसाठी सेवा सुरू केल्यानंतर त्याला प्रवाशांचा चांगला प्रतिसाद लाभणार आहे. धार्मिक पर्यटन आणि निसर्गाचा अनुभव घेऊ इच्छिणाऱ्यांसाठी ही सेवा अत्यंत उपयुक्त ठरेल. या बससेवेचे नियोजन झाल्यानंतर मार्गाची घोषणा, तिकिटाचे दर आणि बसची वेळ याबाबतची सविस्तर माहिती पीएमपी प्रशासन प्रसिद्ध करणार आहे. भीमाशंकरला थेट सेवा सुरू केल्यास जाणे-सोपे होणार आहे.

भीमाशंकरसाठी बससेवा सुरू करण्याच्या हेतूने सर्वेक्षण सुरू केले आहे. काही तांत्रिक अडचणी येत आहेत. मात्र त्यावर मार्ग काढून भीमाशंकरला बससेवा सुरू करणार आहोत.
- पंकज देवरे, अध्यक्ष व व्यवस्थापकीय संचालक, पीएमपीएमएल, पुणे