अपघातप्रकरणी दोन वर्षांत दावा निकाली

पुणे, ता. ३ ः कुटुंबातील कर्त्या व्यक्तीचा मृत्यू झाल्यानंतर दाखल करण्यात आलेला नुकसानभरपाईचा दावा केवळ दोन वर्षांत निकाली निघाला आहे. समुपदेशनाच्या माध्यमातून झालेल्या दुचाकीस्वाराच्या कुटुंबीयांना ७५ लाख रुपयांची भरपाई मिळणार आहे.
लोणीकंद-बकोरी रस्त्यावरून दुचाकीवर जात असताना समोरून भरधाव आलेल्या टेम्पोने दिलेल्या धडकेत राहुल बगाटे यांचा मृत्यू झाला होता. या प्रकरणी लोणीकंद पोलिस ठाण्यात गुन्हा दाखल आहे. बगाटे यांच्या पश्चात पत्नी, दोन मुले आणि आई-वडील असा परिवार असून, त्यांनी टेम्पोची विमा कंपनी असलेल्या एचडीएफसी विरोधात एक कोटी रुपयांचा दावा मोटार अपघात न्यायाधिकरणात दाखल केला होता. हा दावा न्यायाधीश डोरले यांच्या न्यायालयात सुरू असताना तो मध्यस्थीसाठी ॲड. अतुल गुंजाळ यांच्याकडे पाठविण्यात आला. त्यांनी दोन्ही पक्षांशी समुपदेशन करून दावा लवकर निकाली निघण्यास मदत केली. दीर्घकालीन न्यायप्रक्रियेमुळे होणाऱ्या त्रासाची जाणीव करून दिल्याने आणि निर्णयानंतर व्याज भरण्याची शक्यता असल्याने विमा कंपनीनेही दावा मिटविण्यात सहमती दाखवली. प्रमुख जिल्हा न्यायाधीश महेंद्र महाजन आणि पुणे विधी सेवा प्राधिकरणाच्या सचिव न्यायाधीश सोनल पाटील यांच्या हस्ते नुकसानभरपाईचा धनादेश कुटुंबीयांना प्रदान करण्यात आला. अर्जदारांच्या वतीने ॲड. समीर सय्यद आणि ॲड. वी. ए. ब्राह्मणकर यांनी काम पाहिले.