शास्त्रीय संगीताचे अभ्यासक मंगेश वाघमारे यांचे निधन

पुणे, ता. ३ ः आकाशवाणीचे निवृत्त निवेदक आणि शास्त्रीय संगीताचे अभ्यासक मंगेश वाघमारे (वय ६५) यांचे शनिवारी (ता. २) निधन झाले. त्यांच्या पश्चात पत्नी आणि दोन मुले असा परिवार आहे.
आकाशवाणीवरील, तसेच सांस्कृतिक-साहित्यिक कार्यक्रमांमधील वाघमारे यांच्या वैशिष्ट्यपूर्ण निवेदनाने श्रोत्यांना तीन दशकांहून अधिक काळ श्रवणानंद दिला. त्यांचे मूळ गाव अंबड (जि. जालना) हे होय. तेथील श्री दत्तजयंती संगीत महोत्सवात निवेदन करताना त्यांच्यातील निवेदक घडला. गायनाचार्य पं. गोविंदराव जळगावकर यांच्या मार्गदर्शनाने त्यांनी आपली निवेदन शैली घडवली. सुरवातीला काही वृत्तपत्रातून त्यांनी पत्रकारिता केली. पुढे ते आकाशवाणीच्या पुणे केंद्रावर रुजू झाले. तेथे ३३ वर्षे आणि छत्रपती संभाजीनगर केंद्रावर दोन वर्षे निवेदक पदाची जबाबदारी त्यांनी सांभाळली.
‘महक’, ‘परिमल’, श्रुतिका, मुलाखती यातून वाघमारे यांनी रसाळ भाषेत सांगीतिक संकल्पना रसिकांसमोर उलगडल्या. शास्त्रीय, सुगम, चित्रपट संगीताबरोबरच कर्नाटक, पाश्चात्त्य आणि प्रादेशिक लोकसंगीताचा व्यासंग त्यांनी जपला. संगीतकार राम कदम, प्रभाकर जोग, अनिल मोहिले, प्यारेलालजी, पं. हृदयनाथ मंगेशकर यांच्यासह अनेक कलाकारांच्या मैफलींमध्ये त्यांनी सूत्रसंचालन केले होते. वाघमारे यांच्या पार्थिवावर रविवारी पुण्यातील वैकुंठ स्मशानभूमी येथे अंत्यसंस्कार करण्यात आले.

PNE25V37061