लग्नाचे आमिष दाखवून अल्पवयीन मुलीवर अत्याचार

पुणे, ता. ५ : लग्नाचे आमिष दाखवून एका तरुणाने अल्पवयीन मुलीवर लैंगिक अत्याचार केल्याचा प्रकार समोर आला आहे. ही १५ वर्षीय मुलगी गर्भवती राहिल्यानंतर हा प्रकार उघडकीस आला.
या प्रकरणी नांदेड सिटी पोलिस ठाण्यात एका तरुणावर (वय १९, रा. कोथरूड) गुन्हा दाखल करण्यात आला आहे. हा प्रकार १७ मे ते जुलै २०२४ या कालावधीत घडला. पोलिसांनी दिलेल्या माहितीनुसार, अल्पवयीन मुलगी घरी एकटी होती. त्यावेळी त्याने तिला गोड बोलून लग्न करण्याचे आमिष दाखवले. घरी एकटीच असल्याचा गैरफायदा घेत तिच्याशी जबरदस्तीने वारंवार शारीरिक संबंध प्रस्थापित केले. त्यात अल्पवयीन मुलगी गर्भवती राहिली. याबाबत तक्रार प्राप्त झाल्यानंतर पोलिसांनी आरोपीवर बाललैंगिक अत्याचार प्रतिबंधक (पोक्सो) कायद्यान्वये गुन्हा दाखल केला आहे.