खेसे पार्कमध्ये मध्यरात्रीपर्यंत वाहतूककोंडी

वडगाव शेरी, ता. ५ ः मुसळधार पावसामुळे लोहगाव परिसरातील खेसे पार्क येथे रस्त्यावर मोठ्या प्रमाणात पाणी साचल्यामुळे धानोरीकडे जाणारी वाहतूक पूर्णपणे बंद झाली होती. रस्त्यात अनेक वाहने बंद पडल्यामुळे आणि पाण्याचा अंदाज येत नसल्यामुळे लोहगावच्या दिशेने आणि विमानतळाच्या दिशेने वाहतूककोंडी वाढत गेली.
विमाननगर येथून कलवडमार्गे धानोरीला जाणारा रस्ता वाहतुकीसाठी बंद करण्यात आला होता. येथील ओढ्याला मोठा पूर आल्याने सर्व वाहतूक खेसे पार्कमधून जाण्याचा प्रयत्न करत होती. परंतु, खेसे पार्कमध्ये आल्यानंतर येथील रस्ताही बंद असल्याचे वाहनचालकांच्या लक्षात आल्यानंतर गाड्या माघारी वळून जाण्याच्या प्रयत्नात प्रचंड वाहतूककोंडी झाली. विमानतळासमोर एरो मॉलसमोरच्या रस्त्यावर पाणी साचल्यामुळे मध्यरात्री या चौकातही मोठी कोंडी झाली होती. कोंडी सोडविण्यासाठी काही कार्यकर्ते वगळता पोलिस कोठेही दिसले नाहीत.
हवाई दलाने आपल्या मिळकती सीमा भिंत घालून बंदिस्त केल्यामुळे अनेक ठिकाणी पाण्याचे प्रवाह अडले आहेत. त्यामुळे रस्त्यावर पाणी साचण्याच्या घटना कलवड, खेसे पार्क, धानोरी परिसरात समोर येत आहेत.