रामटेकडीत घराला शॉर्टसर्किटमुळे आग शॉर्टसर्किटमुळे आग

हडपसर, ता. ९ : रामटेकडी येथील शांतिनगर झोपडपट्टीतील एका बंद घराला शॉर्टसर्किट होऊन आग लागली. यात घरातील संसारोपयोगी साहित्य खाक झाले आहे. मंगळवारी सांयकाळी पाचच्या सुमारास ही घटना घडली.
येथील प्रथमा इमारतीच्या मागील बाजूस ही वस्ती आहे. येथे अण्णा चतुर्भुज शिंदे यांचे घर आहे. ते स्वतः कामावर तर त्यांचे कुटुंब तुळजापूर येथे देवीच्या दर्शनासाठी गेले होते. त्यामुळे घर बंद होते. सायंकाळी आग लागून महत्त्वाच्या कागदपत्रांसह घरातील साहित्य खाक झाले. दरम्यान, परिसरातील तरुणांनी आग विझविण्याचा प्रयत्न केला. घटनेची माहिती कळताच अग्निशामक दलाची गाडी, वानवडी पोलिस ठाण्याचे कर्मचारी व महावितरणचे कर्मचारी घटनास्थळी दाखल झाले.