औंध आयटीआयमध्ये विद्यार्थ्यांना मार्गदर्शन

बाबा तारे
औंध, ता. १ : दहावी उत्तीर्ण झाल्यानंतर एखादा अभ्यासक्रम पूर्ण करून लगेचच नोकरी मिळेल, किंवा एखादा व्यवसाय सुरू करता येईल, अशा तयारीने अनेक विद्यार्थी औद्योगिक प्रशिक्षण संस्थेत (आयटीआय) प्रवेश घेऊ इच्छितात. परंतु, आपल्या आवडीनुसार किंवा एखाद्या विषयाचे कौशल्य आत्मसात करण्याच्या हेतूने नेमका कोणता आयटीआय अभ्यासक्रम निवडायचा, हे जाणून घेण्यासाठी विद्यार्थी-पालक आयटीआयमध्ये समूपदेशनासाठी येत आहेत.
छत्रपती शिवाजी महाराज शासकीय औद्योगिक प्रशिक्षण संस्थेत अशाच पद्धतीने दररोज अनेक पालक विद्यार्थ्यांसह निःशुल्क मार्गदर्शनासाठी येत आहेत. अनेक पालक अभ्यासक्रमांची माहिती घेण्यासाठी येत असून त्यांना ऑनलाइन अर्ज भरणे, प्रवेशासाठी लागणारी कागदपत्रे याविषयीचे मार्गदर्शन आयटीआयमध्ये केले जात आहे. विद्यार्थ्यांचा कल पाहता त्याला योग्य असा अभ्यासक्रम निवडण्यासह शिक्षणानंतर रोजगाराच्या संधी याबाबत सांगितले जात आहे. एवढेच नव्हे, तर विद्यार्थी-पालकांसाठी ‘प्रयोगशाळा भेट’ आयोजन करून त्यांना प्रत्यक्ष आयटीआयमध्ये प्रात्यक्षिकांवर आधारित कसे शिकविले जाते, याची माहिती दिली जात आहे.