भरघोस नफ्याच्या आमिषाने चार कोटींची फसवणूक

वाघोली, ता. १३ : शेअर बाजारात भरघोस नफा मिळवून देण्याचे आमिष दाखवत सायबर गुन्हेगारांनी वाघोलीतील आयटी अभियंत्यासह दोघांची तीन कोटी ८९ लाख ५० हजार रुपयांची फसवणूक केली आहे. या प्रकरणी वाघोली पोलिस ठाण्यात दोन स्वतंत्र गुन्हे दाखल करण्यात आले आहेत. या दोन्ही प्रकरणांत सायबर गुन्हेगारांनी बनावट मोबाईल अ‍ॅप आणि संकेतस्थळाचा वापर करून गुंतवणुकीच्या नावाखाली आर्थिक फसवणूक केल्याचे समोर आले आहे.

सायबर चोरट्यांनी आयटी क्षेत्रात कार्यरत आयव्ही इस्टेट येथील ५३ वर्षीय नागरिकाला यु-ट्युबवर शेअर मार्केटबाबत आकर्षक जाहिरात दाखवण्यात आली. त्या लिंकवर क्लिक करताच त्यांना व्हॉट्सअ‍ॅप ग्रुपमध्ये सहभागी करण्यात आले. एक अ‍ॅप डाऊनलोड करून त्यावर खाती उघडण्यास सांगण्यात आले. सुरुवातीला काही रक्कम गुंतविल्यानंतर कृत्रिम नफा दाखवून विश्वास संपादन करण्यात आला. त्यानंतर त्या व्यक्तीने स्वतःचे, वडिलांचे आणि आईचे मिळून तीन कोटी ७१ लाख रुपये विविध बँक खात्यांमध्ये गुंतवले. संकेतस्थळावर २० कोटींचा नफा दाखवण्यात आला, मात्र पैसे काढण्यासाठी १० टक्के ‘प्लॅटफॉर्म फी’ भरण्याची अट घालण्यात आली. यामुळे फसवणुकीचा संशय आल्याने त्यांनी ऑनलाइन तक्रार करून पोलिस ठाण्यात गुन्हा दाखल केला.

सायबर चोरट्यांनी केसनंद रोड परिसरातील ५७ वर्षीय दुसऱ्या व्यक्तीस परस्पर अनोळखी व्हॉट्सअ‍ॅप ग्रुपमध्ये सहभागी करण्यात आले. त्या ग्रुपमध्ये सदस्यांकडून बनावट स्क्रीनशॉट शेअर करून शेअर बाजारात नफा झाल्याचे सांगण्यात आले. त्यानंतर टप्प्याटप्प्याने एकूण १० लाख २५ हजार रुपयांची गुंतवणूक त्यांनी केली. नंतर संकेतस्थळ बंद झाले आणि त्यांना ग्रुपमधूनही काढण्यात आले. अखेर फसवणूक झाल्याचे लक्षात येताच त्यांनी सायबर पोलिसांकडे तक्रार केली.