औंध येथे डीपीच्या खोलीत दोघांचा मृत्यू

पुणे/औंध, ता. १४ : ब्रेमेन चौकातून परिहार चौकाकडे जाणाऱ्या रस्त्यावर विद्युत मंडळाच्या डीपीच्या खोलीत दोघांचा मृत्यू झाल्याची घटना घडली. यासंदर्भात चतु:शृंगी पोलिस ठाण्यात अकस्मात मृत्यूची नोंद करण्यात आली आहे. दोघांचा मृत्यू विजेचा धक्का लागल्याने झाल्याची शक्यता पोलिसांनी वर्तवली आहे.
विनोद चिंतामण क्षीरसागर (वय २९, रा. कस्तुरबा गांधी वसाहत, औंध) आणि सौरभ विजय निकाळजे (वय २७, रा. स्टेट बँक नगर, पौड रस्ता, कोथरूड) असे मृत्युमुखी पडलेल्या तरुणांची नावे आहेत. विनोद क्षीरसागर हा रविवारी (ता. १३) सायंकाळी साडेपाच वाजता रिक्षा घेऊन बाहेर पडला होता. रात्री साडेनऊ वाजेपर्यंत घरी न आल्यामुळे त्याच्या आईने औंध पोलिस चौकीत हरवल्याची तक्रार दिली होती. संघवीनगर येथील विद्युत मंडळाच्या डीपीच्या खोलीत दोन तरुण बेशुद्ध अवस्थेत पडल्याचे रविवारी रात्री आढळून आले.
याबाबत नागरिकांनी नियंत्रण कक्षाला माहिती दिल्यानंतर पोलिस घटनास्थळी दाखल झाले. औंध येथील महावितरणच्या कर्मचाऱ्यांना बोलावून विद्युत पुरवठा बंद करण्यात आला. त्या दोघांना तातडीने रुग्णालयात दाखल करण्यात आले. तपासणीनंतर डॉक्टरांनी दोघेही मृत झाल्याचे घोषित केले. मृत्यूचे नेमके कारण शवविच्छेदन अहवाल‌ प्राप्त झाल्यानंतरच समजेल, असे पोलिसांनी सांगितले. पुढील तपास चतु:शृंगी पोलिस करीत आहेत.