भूसंपादन कामाला मिळणार गती

कात्रज, ता. १६ : कात्रज-कोंढवा रस्त्याचे अनेक दिवस रखडलेले भूसंपादनाचे काम अखेर मार्गी लागण्याची चिन्हे दिसत आहेत. भूमिअभिलेख खात्याच्या माध्यमातून या रस्त्याच्या मोजणीच्या कामाला वेग देण्यात आला असून कात्रज भागातील मोजणी जवळपास पूर्ण झाली आहे. कोंढवा भागातील मोजणीचे काम पुढील दोन ते तीन दिवसांत पूर्ण होणार आहे.
यापूर्वी कात्रज-कोंढवा रस्त्याच्या ५० मीटर रुंदीच्या मोजणीचे काम पार पडले होते. मात्र, हा रस्ता ८४ मीटर रुंदीकरण करण्यात येत असल्याने उर्वरित ३४ मीटर भागाची मोजणीही करण्यात येत आहे. कात्रज परिसरातील उत्तर बाजूची मोजणी पूर्ण झाली असून दक्षिण बाजूतील काही जागामालकांच्या हरकतीमुळे ती मोजणी राहिली आहे. हरकतींचा भाग वगळता संपूर्ण ८४ मीटर रुंदीची मोजणी पूर्ण करण्यात आली आहे.
भूमिअभिलेख विभागाकडून दिलेल्या माहितीनुसार, काही जागामालकांना मोजणीसाठी वेळेवर नोटिसा मिळाल्या नसल्याच्या तक्रारी विभागाकडे प्राप्त झाल्या आहेत. त्यामुळे संबंधित जागामालकांना पुन्हा नोटिसा पाठवून सात दिवसांच्या कालावधीनंतर उर्वरित मोजणी करण्यात येणार आहे. कोंढवा भागात दोन ते तीन दिवसांत मोजणी प्रक्रिया पूर्ण होईल. त्यानंतर किती हरकती आहेत, याचे वास्तव स्पष्ट होईल. त्यानंतर हरकती असलेल्या व्यक्तींना पुन्हा नोटिसा पाठवून पुढील प्रक्रिया हाती घेतली जाईल, अशी माहिती हवेलीचे भूमिअभिलेख उपअधीक्षक विकास गोफणे यांनी दिली.

८४ मीटर रस्त्याच्या भूसंपादनासाठी प्राथमिक टप्प्यावर मोजणीची प्रक्रिया सध्या सुरू आहे. मोजणी पूर्ण झाल्यानंतर भूसंपादनाचे काम तातडीने सुरू केले जाईल. मोजणीआधारे भूसंपादनासाठी किती वेळ लागेल याचा अचूक अंदाज येईल.
- श्‍वेता दारुणकर, विशेष भूसंपादन अधिकारी

महत्त्वाचे
- कात्रज भागातील मोजणी हरकती वगळता पूर्ण
- कोंढव्यात मोजणी सुरू; २-३ दिवसांत पूर्ण होण्याची शक्यता
- काही जागामालकांच्या हरकती प्राप्त
- नव्याने नोटिसा देऊन उर्वरित मोजणी होणार
- मोजणीनंतर भूसंपादनाच्या कामाला गती मिळण्याची शक्यता