गरिबांची घरे जमीनदोस्त, हॉटेल्स, रिसॉर्ट्स मात्र शाबूत!

खडकवासला, ता. २४ : वेल्हा तालुक्यातील पानशेत-पाणलोट क्षेत्रात खडकवासला जलसंपदा विभागाकडून केलेल्या अन्यायकारक कारवाईबाबत खडकवासला विधानसभा मतदारसंघाचे आमदार भीमराव तापकीर यांनी सभागृहाचे लक्ष वेधले.
वेल्हे तालुक्यातील वंझारवाडी धरणग्रस्त शेतकरी किसन शंकर कडू, विजय दिनकर कडू व हरिभाऊ शंकर कडू यांच्या पूर्वकालीन घरांवर पोलिस बंदोबस्तात कारवाई करत ती घरे जमीनदोस्त करण्यात आली. ही घरे अनेक वर्षांपासून अस्तित्वात होती. या कुटुंबांचा पानशेत धरणग्रस्त म्हणून पुनर्वसन झाल्याचा इतिहासही आहे.
मात्र, विशेष बाब म्हणजे त्याच परिसरातील पाणलोट क्षेत्रात अस्तित्वात असलेल्या हॉटेल्स, रिसॉर्ट व व्यावसायिक बांधकामांवर कोणतीही कारवाई केलेली नाही, ही बाब गंभीर असल्याचे तापकीर यांनी अधोरेखित केले.
गुंजवणी, पानशेत आणि वरसगाव या धरणांच्या पाणलोट क्षेत्रात सध्या अनधिकृतपणे उभी असलेल्या हॉटेल्स, रिसॉर्ट व व्यावसायिक बांधकामांची सविस्तर यादी व अहवाल सादर करण्यात यावा, तसेच अशा अतिक्रमणधारकांची नावे, मालकीचा प्रकार, संबंधित भूखंडाची स्थिती व त्यांच्या विरोधात केलेल्या अथवा प्रलंबित कारवायांची माहिती शासनाने जाहीर करावी, अशा मागण्या यावेळी तापकीर यांनी केल्या.

“एकाच पाणलोट क्षेत्रात गरिबांच्या घरांवर कारवाई करत श्रीमंत व्यावसायिक घटकांना वाचविण्याचा प्रयत्न प्रशासन करत असेल, तर त्याची शासनाने गंभीर दखल घ्यावी,” असे मत आमदार तापकीर यांनी मांडले. शासनाने या प्रकरणात निष्पक्ष व एकसमान कार्यवाही करावी, अशी जोरदार मागणी त्यांनी विधानसभेत केली.