‘दादाच्या शाळेत’ आर्थिक साक्षरतेचे धडे आकुर्डीत आर्थिक जाणिवा जागृती करण्यासाठी उपक्रम

औंध, ता. २० ः प्रोग्रेसिव्ह एज्युकेशन सोसायटीच्या मॉडर्न महाविद्यालय, गणेशखिंड यांच्यावतीने ‘दादाची शाळा’ या आकुर्डीतील विद्यार्थ्यांसाठी आर्थिक साक्षरतेवर आधारित विशेष कार्यशाळेचे आयोजन करण्यात आले होते. डीईए फंड आणि रिझर्व्ह बँक ऑफ इंडियाच्या सहकार्याने हा उपक्रम राबविण्यात आला. कार्यशाळेचा उद्देश विद्यार्थ्यांमध्ये आर्थिक जाणिवा जागृत करणे हा होता.
पुणे पीपल्स को-ऑपरेटिव्ह बँकेचे माजी मुख्य कार्यकारी अधिकारी सदानंद दीक्षित आणि ईपीडब्ल्यूआर, मुंबईचे बिपिन देवकर यांनी विद्यार्थ्यांना मार्गदर्शन केले. दीक्षित यांनी उत्पन्न, खर्च व बचत यामधील योग्य समतोल साधण्याचे महत्त्व विशद केले. शंभर रुपयांपैकी किमान २० रुपये बचत म्हणून ठेवा, ही सवय लहान वयातच लागली पाहिजे,’ असेही ते यावेळी म्हणाले. देवकर यांनी रिझर्व्ह बँकेच्या विविध योजना, बँक लोकपाल प्रणाली व शासकीय आर्थिक धोरणांची माहिती विद्यार्थ्यांना सोप्या भाषेत दिली. रिझर्व्ह बँक ऑफ इंडियाचे मॅनेजर अक्षय गोंदकर यांनी डिजिटल बँकिंग, सायबर फ्रॉडपासून बचाव तसेच आर्थिक साक्षरतेविषयी माहिती दिली. कार्यक्रमात ‘दादाची शाळा’ या उपक्रमाविषयी माहिती देताना अमोल शिंदे म्हणाले, ‘‘या मुलांना शिक्षणासोबत शिस्तीचे धडेही दिले जात आहेत. गेल्या दहा वर्षांत शाळेची लक्षणीय प्रगती झाली आहे.’’
अभिजित पोखर्णीकर म्हणाले, ‘‘रिझर्व्ह बँकेने जर या मुलांच्या शिक्षणासाठी हातभार लावला तर आणखी मुले शिक्षणाच्या प्रवाहात येऊ शकतील.’’ या कार्यक्रमात बँक ऑफ महाराष्ट्र, आकुर्डी शाखा यांनी विद्यार्थ्यांची खाती उघडून दिली. तिसऱ्या टप्प्यातील हा १३ वा कार्यक्रम यशस्वीरीत्या पार पडला. विद्यार्थ्यांमध्ये बचतीची सवय लागावी, यासाठी प्रत्येकाला पिगी बँक देण्यात आली. यावेळी एफबीएफच्या विद्यार्थ्यांनी पथनाट्य सादर करून उपस्थितांचे लक्ष वेधले. प्रा. विजया कुलकर्णी यांनी प्रास्ताविक केले. समन्वयक म्हणून डॉ. मंजूषा कुलकर्णी यांनी काम पाहिले. बँकेची शपथ श्रद्धा कुलकर्णी हिने घेतली.
------------------------------------------------------