स्वतंत्र वीज कार्यालयाची येवलेवाडीसाठी निर्मिती

कोंढवा, ता. २७ : कोंढवा आणि येवलेवाडी भागातील वाढती लोकसंख्या, नागरिकांच्या वीजविषयक वाढत्या तक्रारी आणि प्रशासकीय सोयीसाठी स्वतंत्र वीज कार्यालयाची मागणी अखेर मान्य करण्यात आली आहे. ऊर्जा विभागाकडून कोंढवा शाखेचे विभाजन करून कोंढवा आणि येवलेवाडी अशी दोन स्वतंत्र वीज कार्यालये स्थापन करण्याचा निर्णय घेण्यात आला आहे.
विधान परिषद सदस्य योगेश टिळेकर यांनी याबाबत विधिमंडळाच्या अर्थसंकल्पीय अधिवेशनात रास्ता पेठ आणि सेंट मेरी उपविभागाचा कार्यभार कमी करावा. त्यासाठी कोंढवा शाखेअंतर्गत तीन स्वतंत्र वीज शाखा कार्यालयांच्या निर्मितीची मागणी केली होती. त्यानंतर मुख्यमंत्री देवेंद्र फडणवीस यांनी विधिमंडळात कोंढवा आणि येवलेवाडीसाठी स्वतंत्र वीज कार्यालये स्थापन करण्याचा निर्णय जाहीर केला होता. त्यानुसार, महावितरणकडून अधिकृत आदेश काढण्यात आला आहे. सध्याच्या रास्ता पेठ विभागीय कार्यालयांतर्गत असलेल्या सेंट मेरी उपविभागीय कार्यालयाची कोंढवा शाखा विभाजित करून, नव्याने येवलेवाडी वीज कार्यालय निर्माण करण्यात येणार आहे.
------
प्रशासकीय खर्चास मंजुरी
नवनिर्मित येवलेवाडी शाखा कार्यालयासाठी १९ पदे निर्माण करण्यात आली आहेत. यामध्ये कोंढवा शाखेतून ९ पदे येवलेवाडी शाखा कार्यालयाच्या आस्थापनेवर वळती करून १० पदांची नव्याने भरती करण्यात येईल. यामध्ये सहायक अभियंता १, कनिष्ठ कार्यालयीन सहायक १, प्रधान तंत्रज्ञ २, वरिष्ठ तंत्रज्ञ ६, तंत्रज्ञ ९ अशी पदे असतील. येवलेवाडी कार्यालयाच्या आस्थापनेसाठी प्रशासकीय खर्चास मंजुरी दिल्याचे पत्र महावितरणचे मुख्य महाव्यवस्थापक भूषण कुलकर्णी यांच्या आदेशान्वये काढण्यात आले आहे.
-----------------------