टेम्पोने धडक दिल्याने दुचाकीस्वार गंभीर जखमी

वाघोली, ता. ४ ः टेम्पोने दुचाकीला दिलेल्या धडकेत दुचाकीवरील व्यक्ती गंभीर जखमी झाली तर त्याचा मुलगा बचावला. हा अपघात सोमवारी सायंकाळी सव्वा पाचच्या सुमारास पुणे- नगर महामार्गावर केसनंद फाट्याजवळ घडला. वाघोली परिसरात पाच दिवसात चार वेगवेगळे अपघात झाले. चारही अपघातात भरघाव चारचाकी वाहनांनी दुचाकीस्वारांना उडविले. यामध्ये तीन जणांचा बळी गेला.
तुकाराम इथापे (वय ४५, रा. वाघोली) असे आज झालेल्या अपघातात गंभीर जखमी झालेल्या व्यक्तीचे नाव आहे. मिळालेल्या माहितीनुसार, इथापे आपल्या मुलासह दुचाकीवरून नगरच्या दिशेने जात होते. केसनंद फाट्यावर त्यांच्या दुचाकीला एका टेम्पोने धडक दिली. यात ते गंभीर जखमी झाले. नागरिकांनी त्यांना जवळच्या खासगी रुग्णालयात दाखल केले.