मिठानगरमध्ये वाहनांची टोळक्याकडून तोडफोड

कोंढवा, ता. २३ : मिठानगर परिसरात अल्पवयीन मुलांच्या टोळक्याने वाहनांची तोडफोड करून दहशत माजवल्याची घटना समोर आली आहे. या घटनेचा व्हिडिओही सोशल मीडियावर व्हायरल झाला असून, पोलिसांनी कारवाई करत ३ अल्पवयीन मुलांना ताब्यात घेतले आहे. याबाबत कोंढवा पोलिस ठाण्यात चौघांविरुद्ध गुन्हा दाखल करण्यात आला आहे.
शनिवारी मध्यरात्री दीडच्या सुमारास ३ ते ४ जण दुचाकीवरून मिठानगरमध्ये आले. त्यांच्यातील एका अल्पवयीन मुलाचा वाद झाल्याने, संतापातून टोळक्याने परिसरात उभ्या असलेल्या वाहनांवर हल्ला चढवला. त्यांनी तीन रिक्षा आणि दोन मोटारीच्या काचा कोयत्याने फोडून दहशत माजवली.
या घटनेत रिक्षाचालक अतिक अहमद शेख (वय ४८, रा. मिठानगर, कोंढवा) यांनी फिर्याद दिली आहे. त्यांच्या रिक्षाचे या हल्ल्यात नुकसान झाले आहे. प्राथमिक तपासात अल्पवयीन मुलांमध्ये किरकोळ कारणावरून वाद झाल्याचे समोर आले आहे. त्यातूनच रागाच्या भरात टोळक्याने वाहनांची तोडफोड केली. या प्रकरणी गुन्हा दाखल करण्यात आला आहे. तिघांना ताब्यात घेतले असल्याची माहिती कोंढवा पोलिस ठाण्याचे वरिष्ठ पोलिस निरीक्षक विनय पाटणकर यांनी दिली.
------