रेल्वेच्या धडकेने घोरपडीत ज्येष्ठ महिला ठार

घोरपडी, ता. २८ : भारत फोर्ज कंपनीजवळ वेगवान रेल्वेच्या धडकेत ज्येष्ठ महिला ठार झाली. मंगळवारी दुपारी बारा वाजण्याच्या सुमारास ही घटना घडली. कांता अशोक खरारे (वय ७०, रा. जाधव वस्ती, घोरपडी) असे अपघातात मृत्यमुखी पडलेल्या महिलेचे नाव आहे. त्या दुपारी कामावरून घाईघाईने रूळ ओलांडून घरी जात होत्या. त्या वेळी रेल्वेची धडक बसून त्यांचा मृत्यू झाला. स्वच्छतागृहांची साफसफाई करून दोन नातींचा त्या सांभाळ करीत होत्या. त्यांना आजी हाच एकमेव आधार होता. या घटनेमुळे दोन नातींचा एकमेव आधारही हरपला. या घटनेमुळे परिसरात हळहळ व्यक्त करण्यात येत आहे. रेल्वे पोलिसांनी या घटनेचा पंचनामा करण्यासाठी दिरंगाई केली. सुमारे दोन तास मृतदेह रेल्वे रुळावरच पडून होता. त्यामुळे नागरिकांनी संताप व्यक्त केला.