सिटी चर्चच्या वतीने पेशव्यांच्या वंशजांचा सन्मान

घोरपडी, ता. १५ : नाना पेठ क्वार्टर गेट येथील सिटी चर्च या सर्वांत जुन्या कॅथॉलिक चर्चला नुकतीच २३३ वर्षे पूर्ण झाली. यानिमित्त आयोजित कार्यक्रमात पुष्करसिंह पेशवा, जयमंगलाराजे पेशवा आणि रियाराजे पेशवा यांचा प्रमुख धर्मगुरू फादर लुई हेरेडिया यांच्या हस्ते सत्कार करण्यात आला.

या वेळी फादर अल्फान्सो, फादर भाऊसाहेब संसारे, रिजनल ख्रिश्चन सोसायटीचे अध्यक्ष लुकस केदारी, सोसायटीचे संघटक पीटर डिसूझा, फ्लॉरिना वाझ, मिलिफा फर्नांडिस, जोएन डिसूझा उपस्थित होते.

सवाई माधवराव पेशव्यांनी १७९२ मध्ये सिटी चर्चसाठी जमीन दिली होती. हे शहरातील पहिले चर्च असून, चर्चने या जागेत शाळा सुरू करून या भागात मोठे शैक्षणिक कार्य उभे केले आहे, अशी भावना पुष्करसिंह पेशवा यांनी व्यक्त केली.

पुष्करसिंह पेशवा म्हणाले की, आज जाती आणि धर्मांकडे वेगळ्या नजरेने पाहिले जात आहे. सत्तेसाठी पूर्वी संघर्ष झाला. मात्र, एका पातळीनंतर संबंध जोपासले जात होते. चिम्माजीअप्पांनी वसईच्या लढ्यात पोर्तुगीजांचा पराभव केला. मात्र, मराठ्यांनी तेथील पोर्तुगीजांचा धर्म बदलला नाही. आज तेथे मराठी आणि ख्रिश्चन लोक मिळून मिसळून राहतात. हेच उदाहरण पुण्यात सिटी चर्चच्या बाबतीत दिसते.

प्रमुख धर्मगुरू फादर लुई हेरेडिया यांनी पेशवा कुटुंबीयांबद्दल कृतज्ञता व्यक्त केली. यंदापासून नाताळ सण सर्वधर्मीयांसह सिटी चर्च येथे साजरा करण्याचा संकल्प ख्रिश्चन समाजाचे नेते लुकस केदारी यांनी जाहीर केला.

नाना पेठ ः सिटी चर्चच्या वतीने पेशव्यांच्या वंशजांच्या सन्मानावेळी उपस्थित मान्यवर.