मार्केट यार्डात ९० ट्रक फळभाज्यांची आवक

मार्केट यार्ड, ता. १५ : पावसामुळे पुणे बाजार समितीच्या गुलटेकडी मार्केट यार्डात राज्यासह परराज्यांतून फळभाज्यांची आवक कमी होत आहे. आवक कमी झाल्याने मटारच्या भावात वाढ झाली आहे तर, घेवड्याच्या भावात घट झाली असून अन्य सर्वच प्रकारच्या फळभाज्यांचे भाव मागील आठवड्याच्या तुलनेने स्थिर होते.
गुलटेकडी मार्केट यार्डात रविवारी (ता. १५) राज्याच्या विविध भागांसह परराज्यांतून सुमारे ९० ट्रक फळभाज्यांची आवक झाली. परराज्यांतून झालेल्या आवकीमध्ये कर्नाटक येथून कोबी ३ ते ४ टेम्पो, आंध्र प्रदेश आणि तमिळनाडू येथून शेवगा ४ ते ५ टेम्पो, इंदूर येथून गाजर ५ ते ६ टेम्पो, कर्नाटक आणि हिमाचल प्रदेश येथून घेवडा ३ ते ४ टेम्पो, हिमाचल प्रदेश ३ टेम्पो मटार, आंध्रप्रदेश आणि तमिळनाडू येथून कैरी ३ ते ४ टेम्पो, मध्यप्रदेश येथून लसणाची सुमारे ८ ते १० टेम्पो तर इंदर, आग्रा, स्थानिक भागातून बटाटा ४० ते ४२ टेम्पो इतकी आवक झाली होती.
स्थानिक भागांतून झालेल्या आवकीमध्ये सातारी आले सुमारे ५५० ते ६०० गोणी, भेंडी ५ ते ६ टेम्पो, गवार ३ ते ४ टेम्पो, टोमॅटो ७ ते ८ हजार क्रेट, हिरवी मिरची ५ ते ६ टेम्पो, काकडी ७ ते ८ टेम्पो, फ्लॉवर १४ ते १५ टेम्पो, कोबी ५ ते ६ टेम्पो, ढोबळी मिरची ५ ते ६ टेम्पो, गाजर ४ ते ५ टेम्पो, भुईमूग शेंग १०० गोणी, तांबडा भोपळा १० ते १२ टेम्पो, कांदा सुमारे ७० ते ७५ टेम्पो इतकी आवक झाली होती, अशी माहिती मार्केटयार्डमधील ज्येष्ठ अडते विलास भुजबळ यांनी दिली.
फळभाज्यांचे दहा किलोचे भाव : कांदा : १५०-२००, बटाटा : १४०- २१०, लसूण : ३५०- ११००, आले सातारी: २५०-२६०, भेंडी : ३००-४००, गवार : ७००- ९००, टोमॅटो : १५०- २५०, दोडका : ५००-६००, हिरवी मिरची : ३००-४००, दुधी भोपळा : १००-२००, चवळी : २५०-३००, काकडी : २००-२५०, कारली : हिरवी ४००-४५०, पांढरी : २५०-३००, पापडी : ४००-५००, पडवळ : २५०-३००, फ्लॉवर : १८०-२००, कोबी : ८०- १२०, वांगी : ३००-५००, डिंगरी : ४००-४५० नवलकोल : ५०-६०, ढोबळी मिरची : ५००- ५५००, तोंडली : कळी : ४०० - ५००, जाड : २०० -२२०,शेवगा : ५००-५५०, गाजर : २५०-३०० वालवर : ७००-८००, बीट : १४०-१५०, घेवडा : ६००-७००, कोहळा : १००- १५०, आर्वी : ३००-३२० घोसावळे : २५०-३००, ढेमसे : २५०-३००, भुईमूग शेंग : ४००-५००, मटार : परराज्य : १३००-१४००, पावटा : ५००-५५०, तांबडा भोपळा : १००-१५०, तोतापुरी कैरी : २००-३००, सुरण : १८०-२००, मका कणीस : ५०-१००, नारळ (शेकडा) : १०००- १६००.

पुदीना, अंबाडी, चुका आणि चवळीच्या भावात वाढ
गुलटेकडी येथील मार्केट यार्डात मागणीच्या तुलनेत पालेभाज्यांची आवक घटल्याने पुदीना, अंबाडी, चुका आणि चवळीच्या भावात वाढ झाली असून कोथींबीर, शेपू आणि पालकच्या भावात काहीशी घट झाली आहे.
गुलटेकडी मार्केट यार्डातील घाऊक बाजारात रविवारी (ता. १५) कोथिंबिरीची सुमारे ९० हजार जुडी तर मेथीची २० हजार जुडींची आवक झाली होती. पालेभाज्यांचे शेकड्यातील भाव : कोथिंबीर : १००० ते २५००, मेथी : २०००-३५००, शेपू : ८००- १५००, कांदापात : १५००-२०००, चाकवत : ५००-८००, करडई : ४००-६००, पुदिना : ५००-१०००, अंबाडी : ५००-८००, मुळे : १२००-१५००, राजगिरा : ४००- ७००, चुका : ५००-१०००, चवळई : ५००-८००, पालक : १५००-२०००.

कलिंगड, खरबूज महाग; लिंबू स्वस्त
पावसाच्या तडाख्यामुळे कलिंगड, खरबुजाच्या उत्पादनावर परिणाम झाला आहे. बाजारात या फळांची आवक रोडावली आहे. मागणी जास्त असल्याने या फळांच्या भावात पाच टक्क्यांनी वाढ झाली आहे. तर, चिकूच्या भावात दहा किलोमागे दोनशे रुपयांनी वाढ झाली आहे. लिंबे मोठ्या प्रमाणात बाजारात येत असल्याने १५ किलोंच्या गोणीमागे शंभर रुपयांनी दर उतरले आहेत. मागणी आणि पुरवठा यातील समतोलामुळे उर्वरित फळांचे भाव मागील आठवड्याच्या तुलनेत स्थिर असल्याची माहिती व्यापाऱ्यांनी दिली.
मार्केट यार्ड येथील फळबाजारात रविवारी (ता. १५) मोसंबी २५ ते ३० टन, संत्री १ टन, डाळिंब २५ ते ३० टन, पपई २० ते २५ टेम्पो, लिंबांची सुमारे दीड ते दोन हजार गोणी, कलिंगड ४ ते ५ टेम्पो, खरबूज २ ते ३ टेम्पो, चिकू ३०० बॉक्स, पेरू ४०० ते ५०० क्रेट, अननस ४ ट्रक तर सीताफळाची अवघी ४० ते ५० क्रेट इतकी आवक झाली होती.
फळांचे भाव पुढीलप्रमाणे - लिंबे (प्रतिगोणी) : २००-५००, मोसंबी : (३ डझन) : २६०-३५०, (४ डझन) : १२०-२२०, संत्री : (१० किलो) : ३००-८००, डाळिंब (प्रतिकिलोस) : भगवा : ४०-१४०, आरक्ता : १०-६०, गणेश : १०-३०, कलिंगड : ५-१५, खरबूज : १०-३०, पपई : ४-१६, चिक्कू (दहा किलो) : २००-८००, पेरू (२० किलो) : ३००-५००, अननस (१ डझन): १००-६००, सीताफळ (१ किलो) : ५०-३००

फुलांची आवक वाढल्याने भावात घसरण
हवामान विभागाने पावसाचा अंदाज वर्तविल्यामुळे शेतकऱ्यांकडून मोठ्या प्रमाणात फुले विक्रीस पाठविण्यात आली आहेत. दरवेळीच्या तुलनेत आवक दुपटीने वाढली आहे त्यामुळे भावात निम्म्याने घसरण झाली असल्याची माहिती व्यापारी सागर भोसले यांनी दिली.
फुलांचे प्रतिकिलोचे दर पुढीलप्रमाणे : झेंडू : १०-२०, गुलछडी : २५-५०, अ‍ॅष्टर : जुडी २०-४०, सुट्टा ८०-१००, कापरी : ३०-५०, शेवंती : ६०-१००, (गड्डीचे भाव) गुलाबगड्डी : १०-२०, गुलछडी काडी : २०-६०, डच गुलाब (२० नग) : २०-५०, जरबेरा : ३०-४०, कार्नेशियन : १५०-१८०, शेवंती काडी : १५०-२००, लिलियम (१० काड्या) ८००-१०००, ऑर्चिड ४००-५००, ग्लॅडिओ (१० काड्या) : ८०-१२०, जिप्सोफिला : ५०-१००, मोगरा : ३००-४००.