भुसार बाजारातील अनधिकृत बांधकामांना नोटिसा

मार्केट यार्ड, ता. १५ : पुणे कृषी उत्पन्न बाजार समितीमध्ये संचालक मंडळ अस्तित्वात आल्यापासून गूळ-भुसार विभागात अनधिकृत बांधकामांचा सुळसुळाट झाला होता. पणनमंत्री जयकुमार रावल यांनी विधीमंडळात अनधिकृत बांधकामांवर कारवाई करण्याची घोषणा केल्यानंतर खडबडून जागे झालेल्या प्रशासनाने मंगळवारी (ता. १५) अनधिकृत बांधकाम करणाऱ्या तब्बल १० भुखंडधारकांना नोटिसा दिल्या आहेत.
समितीने दिलेल्या नोटिशीमध्ये ५० हजारांचा दंड आणि त्यावरील पहिल्या नोटिशीच्या दिवसापासूनच व्याज तसेच सात दिवसांत अनधिकृत बांधकाम काढण्याचा आदेश दिला आहे. याबाबतची माहिती पुणे कृषी उत्पन्न बाजार समितीचे सचिव डॉ. राजाराम धोंडकर यांनी दिली आहे. संचालक मंडळ आल्यापासून बाजार समितीमध्ये अनेक अनधिकृत व चुकीची कामे सुरू असल्याच्या तक्रारी आहेत. त्यापैकी अनधिकृत बांधकामाचा मुद्दा पुन्हा एकदा ऐरणीवर आला आहे. भुसार बाजारात सामान्य भूखंडधारकास साधी फरशी बदलायची म्हटले तरीही परवानगी दिली जात नाही. तसेच किरकोळ दुरुस्ती केली तरी बाजार समितीचे कर्मचारी संबंधित भूखंडघारकांना विविध प्रकारे मानसिक त्रास देत असल्याच्या अनेकदा व्यापाऱ्यांनी तक्रारी केल्या आहेत. बाजारातील काही भूखंडधारक संचालक मंडळाच्या आशीर्वादाने तसेच काही भूखंडांवर मजलेच्या मजले चढवत आहेत. तसेच काहींनी देखील शेड मारले आहेत.