झेंडूची विक्रमी आवक

मार्केट यार्ड, ता. १ : मार्केट यार्डातील फूल बाजारात बुधवारी झेंडूची तब्बल २५० ते ३०० टन आवक झाली. दर्जानुसार ७० ते १०० रुपये भाव मिळाला. शेवंती, गुलछडी, जरबेरा, गुलाब यांसह इतर फुलांनाही मोठ्या प्रमाणात मागणी होती.
फुले खरेदीसाठी पुणेकरांनी बुधवारी मार्केट यार्ड, महात्मा फुले मंडईत सकाळपासूनच मोठी गर्दी केली होती. मागील वर्षीच्या तुलनेत यंदा ओल्या फुलांची आवक जास्त होती. दसऱ्याला सर्वाधिक मागणी झेंडू, गुलछडी, शेवंती, अॅस्टर या फुलांना आहे. मार्केट यार्डातील फूलबाजारात दोन दिवसांपासून झेंडूची मोठ्या प्रमाणावर आवक सुरू असून, दोन दिवसांत अंदाजे झेंडूची तब्बल २५० ते ३०० टन आवक झाली.
बाजारात पुणे, सोलापूर, धाराशिव, बीड, हिंगोली परिसरातील शेतकऱ्यांनी मोठ्या प्रमाणावर झेंडू विक्रीस आणला होता. सततच्या पावसामुळे झेंडूच्या प्रतवारीवर मोठा परिणाम झाला असल्याची माहिती मार्केट यार्डातील फूल व्यापारी सागर भोसले यांनी दिली. शुक्रवारी सकाळपासून मार्केट यार्डात हार विक्रेते, किरकोळ खरेदीदारांची मोठी गर्दी झाली होती. यंदा झेंडूची आवक वाढल्याने भावात घट झाली आहे.

आवक आणि भाव
प्रकार -- भाव प्रतिकिलो
- झेंडू -- ७० ते १०० रुपये
- पांढरी शेवंती -- १०० ते २०० रुपये
- पिवळी शेवंती -- १०० ते २०० रुपये
- चमेली -- १३०० रुपये
- जुई -- १४०० रुपये

मार्केट यार्डात वाहतूक कोंडी
मार्केट यार्डात फुले खरेदीसाठी नागरिकांनी सोमवारी मोठ्या प्रमाणावर गर्दी केली होती. त्यामुळे वाहतूक कोंडी झाली होती. मार्केट यार्डातील शिवनेरी रस्ता, भुसार बाजार, नेहरू रस्त्यावर शेतकऱ्यांनी झेंडू विक्रीस मांडल्याने वाहतूक कोंडी झालेली पाहायला मिळाली. कोंडीतून वाट काढत नागरिकांनी झेंडू खरेदी केला. टेम्पो, रिक्षा अशा वाहनांतून किरकोळ बाजारातील विक्रेते झेंडू घेऊन गेले.

सुरक्षा रक्षक गायब
मार्केट यार्डात बाजाराच्या सुरक्षेसाठी आणि वाहतूक कोंडीत टाळण्यासाठी रक्षकांची नेमणूक केलेली आहे. मार्केट यार्डात दिवसभर वाहतूक कोंडी होती. मात्र वाहतूक कोंडी सोडविण्यासाठी सकाळपासूनच बाजार समितीचे सचिव डॉ. राजाराम धोंडकर यांच्यासह बाजार समितीचे कर्मचारी झटत होते. तसेच शेतकऱ्यांना फुले विक्रीसाठी जागा उपलब्ध होते का नाही याची पाहणीदेखील त्यांनी केली. परंतु अनेक ठिकाणी वाहतूक कोंडी सोडविण्यासाठी सुरक्षारक्षक दिसून आले नाहीत. त्यामुळे सुरक्षारक्षक कुठे गायब झाले, याची चर्चा बाजार समितीच्या कर्मचाऱ्यांमध्ये रंगली होती.

फूल बाजारात दसऱ्यानिमित्त झेंडू, शेवंती, गुलाब, ॲस्टर आणि इतर फुलांची आवक वाढलेली आहे. बाजार आवाराच्या बाहेर शिवनेरी रोड, गूळ भुसार आवारात ५०० ते ६०० पिकअप शेतकऱ्यांनी स्वतः फुले विक्री केली.
- संतोष कुंभारकर, फूल बाजार विभागप्रमुख, कृषी उत्पन्न बाजार समिती, पुणे