व्यापाऱ्यांकडून लक्ष्मीपूजन उत्साहात

मार्केट यार्ड, ता. २१ : दिवाळीच्या शुभमुहूर्तावर मंगळवारी सकाळपासूनच व्यापाऱ्यांमध्ये उत्साहाचे वातावरण होते. सकाळीच दुकानांपुढे रांगोळ्या, फुलांच्या माळांनी सजलेले दरवाजे, ऊस आणि केळीच्या थाटाने सजवलेले प्रवेशद्वार, तसेच आकर्षक विद्युत रोषणाईमुळे संपूर्ण परिसर उजळून निघाला होता. पारंपरिक गणवेश परिधान करून सहकुटुंब उपस्थित राहिलेल्या व्यापाऱ्यांनी लक्ष्मीपूजन करून नवीन वह्यांचे पूजन केले.
काही व्यापाऱ्यांनी सकाळच्या मुहूर्तावर, तर बहुतांश व्यापाऱ्यांनी सायंकाळच्या सत्रात पूजन केले. भुसार विभागासह सर्व विभागांमध्ये सजावट, रोषणाई आणि पारंपरिक वेशभूषेमुळे मार्केट यार्ड येथे सणाचा आनंद द्विगुणित झाला होता. पूजेच्या प्रारंभी नवीन वहीवर स्वस्तिकाचे चिन्ह काढून ‘श्री’ लिहिण्यात आले. त्यानंतर श्री लक्ष्मी, सरस्वती आणि गणरायाला आवाहन करून समृद्धी, सौख्य व निरोगी आरोग्याची प्रार्थना करण्यात आली. दुपारनंतर गूळ आणि भुसार विभागात भक्‍तिमय वातावरण होते. सर्व दुकानांत दिव्यांचा प्रकाश आणि मंत्रोच्चारांचा नाद घुमत होता. पूजनानंतर काही व्यापाऱ्यांनी ग्राहकांना मिठाई वाटप करून शुभेच्छा दिल्या.

आज वजनकाट्याचे पूजन
पाडव्याच्या मुहूर्तावर उद्या बुधवारी (ता. २२) सकाळी ७ ते ८.३० या वेळेत वजनकाटे आणि वजनमापे यांचे पूजन केले जाणार आहे. या वेळी मुहूर्ताचा पहिला माल ठरावीक ग्राहकांना पाठविण्याची व्यापाऱ्यांची परंपरा आहे. नवीन वहीत या मालाची नोंदणी करून त्यासोबत मिठाई पाठवली जाते, अशी माहिती दि पूना मर्चंट्स चेंबरचे अध्यक्ष राजेंद्र बाठिया यांनी दिली.

फळे, भाजीपाला विभागातही उत्सवाचे रंग
भुसार बाजारासह फळे, भाजीपाला, कांदा-बटाटा आणि केळी विभागातही मंगळवारी लक्ष्मीपूजन मोठ्या उत्साहात पार पडले. सकाळपासूनच अडत्यांनी दुकाने स्वच्छ करून फुलांच्या माळांनी सजवली होती. सायंकाळी सगळीकडे घंटानाद, आरत्या आणि दिव्यांच्या प्रकाशात पूजनाचा मंगल सोहळा साजरा झाला. त्यामुळे संपूर्ण मार्केट यार्ड उत्साह, श्रद्धा आणि समृद्धीच्या भावनेने उजळून निघाले.