पुणे : 'महाराष्ट्र बंद' आंदोलनामुळे फातिमानगर चौकात वाहतूक कोंडी

घोरपडी - उत्तरप्रदेशातील लखीमपूर खिरीमधील शेतकऱ्यांवर झालेल्या निर्दयी कृत्याविरूध्द पुकारण्यात आलेल्या बंदला वानवडीत संमिश्र प्रतिसाद मिळाला. महाविकास आघाडीच्या वतीने वानवडीतील संविधान चौकात 'संविधानाच्या' प्रतिमेस पुष्पहार अर्पण करुन 'महाराष्ट्र बंद' च्या रॅलीला सुरुवात करण्यात आली होती. महाराष्ट्र बंद निमित्त वानवडी पोलीसांकडून कडक बंदोबस्त ठेवण्यात आला होता.

रॅलीत काँग्रेसचे जेष्ठ नेते माजी मंत्री बाळासाहेब शिवरकर, राष्ट्रवादी काँग्रेसचे शहराध्यक्ष प्रशांत जगताप, माजी नगरसेवक शिवाजी केदारी, अभिजित शिवरकर, साहिल केदारी, मकरंद केदारी, दिलीप जांभूळकर, प्रफुल्ल जांभूळकर, केविन मँन्यूअल व तिन्ही पक्षाचे पदाधिकारी, कार्यकर्ते सहभागी झाले होते.

राष्ट्रवादी काँग्रेस, काँग्रेस, शिवसेना यांच्या वतीने आझादनगर, साळुंखे विहार, केदारीनगर, शिवरकर रस्ता या मार्गे दुचाकी रॅली काढण्यात आली. पक्षाचे पदाधिकारी व कार्यकर्ते यांनी रस्त्यांवरील अत्यावश्यक सेवेतील दुकाने वगळता इतर दुकाने बंद करण्याचे आवाहन केले.

रॅली सोलापूर रस्त्यावरील फातिमानगर चौकात आल्यावर वाहतूक कोंडी निर्माण झाली होती. त्यामुळे सोलापूर रस्ता व शिवरकर रस्ता वाहतुकीसाठी बंद ठेवला होता. काही वेळाने मोदी सरकार विरुद्ध घोषणाबाजी करत रॅली जिल्हाधिकारी कार्यालयाकडे रवाना झाली. त्यानंतर वानवडीतील जनजीवन पुर्वपदावर आले.