Fursungi Uruli Devachi : फुरसुंगी, उरुळी देवाची नगरपरिषदेसाठी मिळकतीचे हस्तांतरण

पुणे - फुरसुंगी आणि उरुळी देवाची ही दोन गावे महापालिकेतून वगळून त्यांची स्वतंत्र नगरपरिषद स्थापन करण्यात आली आहे. या नगरपरिषदेच्या हद्दीतील सर्व शासकीय मिळकती नगर परिषदेकडे हस्तांतरित करण्यास स्थायी समितीच्या बैठकीत मान्यता देण्यात आली.

पुणे महापालिकेत २०१७ मध्ये ११ गावे समाविष्ट झाली, त्यामध्ये फुरसुंगी आणि उरुळी देवाची या दोन गावांचा समावेश होता. पण ही दोन्ही गावे महापालिकेतून वगळून त्यांची स्वतंत्र नगर परिषद स्थापन करण्याचा निर्णय राज्य सरकारने ११ सप्टेंबर २०२४ रोजी घेतला.

या नगर परिषदेकडे पुरेसे मनुष्यबळ व सुविधा नसल्याने तेथील दैनंदिन स्वच्छता व अत्यावश्यक कामे महापालिकेकडूनच केली जात आहेत. तसेच या नगर परिषदेच्या कामाचा आराखडा तयार करण्यासाठी विभागीय आयुक्तांच्या अध्यक्षतेखाली समिती नेमण्यात आली आहे. टप्प्या टप्प्याने या सोयी सुविधा हस्तांतरित झाल्यानंतर या दोन्ही गावांच्या जबाबदारीतून महापालिका मुक्त होणार आहे.

२०१७ मध्ये ही दोन गावे समाविष्ट झाली तेव्हा ग्रामपंचायतीच्या मालकीच्या इमारती, बखळ, बाजार, गाळे अशा ११६ मिळकती आणि आरक्षणापोटी ताब्यात आलेल्या १३ जागांची माहिती संकलित करण्यात आली आहे.

पहिल्या टप्प्यात दोन्ही ग्रामपंचायतीकडून महापालिकेत आलेल्या मिळकती नगर परिषदेच्या ताब्यात दिल्या जातील.. त्यानंतर सेवा क्षेत्र व रस्त्यांसाठी ताब्यात आलेल्या जागा, महापालिकेच्या नागरी सेवा केंद्राच्या जागा नगर परिषदेला दिल्या जातील.