प्रशासन अडकलय कोरोनात, वाळू माफियांचे सुरू आहेत असले धंदे  

आंबेठाण (पुणे) : खेड तालुक्यातील आसखेड खुर्द आणि आसखेड बुद्रुक येथील भामा नदीत मोठ्या प्रमाणात बेकायदा वाळू उपसा होत आहे. विनापरवाना सुरू असलेल्या या उपशाने शासनाचा लाखो रुपयांचा महसूल बुडत असून, वाळू माफिया मात्र लॉकडाउनच्या काळात स्वतःचे उखळ पांढरे करताना दिसत आहे. विशेष म्हणजे, या भरमसाठ उपशाने येथे सुरू असणारे कोल्हापूर पद्धतीच्या बंधाऱ्याचे काम रखडले आहे.

पुण्याच्या इतर बातम्या वाचण्यासाठी येथे क्लिक करा

महसूलचे अधिकारी कोरोना लढ्यात गुंतलेले आहेत. याचा गैरफायदा घेत वाळू माफियांकडून हा उपसा केला जात आहे.आसखेड बुद्रुक गावच्या हद्दीत मागील एक महिन्यापासून हा उपसा सुरू असून, आसखेड खुर्द गावच्या हद्दीत तीन दिवसांपूर्वी सुरुवात करण्यात आली आहे. या वाळूउपशामुळे येथे असणाऱ्या विहिरीला देखील धोका निर्माण झाला आहे. येथील शेतकऱ्यांच्या पाणीयोजना अडचणीत आल्या आहेत.

पावसाने पाठ फिरविल्याने शेतकरी हवालदिल

आसखेड खुर्द आणि आसखेड बुद्रुक या दोन गावादरम्यान पुणे जिल्हा परिषदेच्या लघु पाटबंधारे विभागाकडून जवळपास ७८ लाक्ख रुपये खर्च करून कोल्हापूर पध्दतीचा बंधारा उभारला जात आहे. परंतु, सध्या या भागांमध्ये वाळू माफियांकडून मोठ्या प्रमाणात बेकायदा वाळू उपसा सुरू आहे. त्यामुळे नदीपात्राची पूर्णपणे चाळण झाली असून, मोठ- मोठे खड्डे पडले आहेत. त्यामुळे नदीपात्रात मोठ्या प्रमाणात पाणी साचत असून, बंधाऱ्याचे काम करण्यात अडचण येत आहे. सध्या बंधाऱ्याचे काम मार्गी लागले नाही, तर अजून एक वर्ष नागरिकांना पाण्याची वाट पाहावी लागणार आहे. 

सावधान, वापरलेले मास्क रस्त्यावर टाकताय

कोरोनाचे कारण देत महसूलचा कोणताही अधिकारी या प्रकाराकडे गांभीर्याने पाहत नसल्याचे वास्तव आहे. येथून वाळूची मोठ्या प्रमाणात वाहने भरून नेले जात असल्याने गावठाणाअंतर्गत रस्त्याचे व शेतकऱ्यांच्या शेतीकडे जाणाऱ्या रस्त्याचे नुकसान झाले असून, याबाबत नागरिकांनी तीव्र भावना व्यक्त केल्या आहेत. महसूल विभाग किंवा संबंधित अधिकाऱ्यांनी तत्काळ या ठिकाणी सुरू असणारा बेकायदा वाळू उपसा थांबवावा, अशी मागणी दोन्ही गावातील नागरिकांनी केली आहे.