साहेब... उंड्री-पिसोळीतील ओढा पाहण्यासाठी दुर्बिन देता का दुर्बिन

उंड्री - ओढा (Odha) पाहण्यासाठी दुर्बिन देता का दुर्बिन (Binoculars) असा टाहो हवेली तालुक्यातील ग्रामस्थांकडून केला जात आहे. ओढा रुंदीकरण आणि खोलीकरणाचा उपक्रम शासनाकडून (Government) राबविला जात आहे, तर दुसरीकडे बांधकाम व्यावसायिकांकडून ओढा गिळंकृत करण्याची स्पर्धाच सुरू झाल्याचे चित्र उपनगर आणि लगतच्या गावात दिसत आहे. गावातील ओढे फक्त चित्रात पाहावे लागतील, अशी टिपण्णी उंड्री ग्रामस्थांनी दिली.

कात्रज बायपास रस्त्यावरील उंड्रीपासून उगम पावलेला ओढा अमित कलरी, बिशप स्कूल, कडनगर चौक मार्गे महंमदवाडी असा ३३ फूट रुंद आणि साडेतीन किमी लांबीचा आहे. या ओढ्यावर ठिकठिकाणी अतिक्रमण झाले आहे. मात्र, बिशप स्कूलने चक्क ओढ्यात सिमेंटचे पाईप टाकून त्यावर बांधकाम केल्याने पावसाचे पाणी गेल्या वर्षी क्रोम सोसायटी आणि नाल्यालगत असलेल्या नागिरकांच्या घरामध्ये पाणी शिरल्याने मोठे नुकसान झाले होते. बिशप स्कूलने बंद केलेला ओढा कधी खुला करणार का असा सवालही विजय कड, शंकर कवडे, विजय चौधरी नागरिकांनी उपस्थित केला आहे.

ग्रामस्थ अल्लाबक्ष शेख, अविनाश टकले, राजेंद्र भिंताडे म्हणाले की, तब्बल ३३ फूट रुंदीच्या ओढ्यावर बांधकाम करून पाणी जाण्यासाठी अवघ्या दोन-तीन फुटी सिमेंट पाईप टाकल्याने नागरिकांच्या घरात पाणी शिरले होते. यावेळी पालिका अधिकाऱ्यांनी घटनास्थळी भेट देऊन पाहणी करून कारवाई केली जाईल, असे सांगितले होते. मात्र, अद्याप कोणतीही कारवाई का केली नाही, असा सवाल ग्रामस्थांनी उपस्थित केला आहे.

दरम्यान, पालिकेच्या बांधकाम विभागातील कनिष्ठ अभियंत्यांनी सांगितले की, उंड्रीतील ओढ्यावर अतिक्रमण करणाऱ्यांना नोटीस दिली आहे. बिशप स्कूलने ओढा खुला करणार असल्याचे त्यांनी सांगितले.