पुणे : कात्रजच्या प्राणी संग्रहालयात अभूतपूर्व गर्दी

कात्रज - कोरोनाच्या पार्श्वभूमीवर १४ मार्च २०२० रोजी बंद करण्यात आलेले राजीव गांधी प्राणी संग्रहालय २० मार्च २०२२ रोजी पर्यटकांसाठी खुले करण्यात आले. त्यानंतर उन्हाळी सुटीमुळे प्राणी संग्रहालयात भेट देण्यासाठी लहान मुलांसह अबालवृद्धांची गर्दी होत आहे. सध्या शाळेला सुट्या आहेत. तसेच, शनिवारी आणि रविवारी पालकांसाठीही सुटीचा दिवस असतो. या पार्श्वभूमीवर रविवारी (ता. १५) प्राणिसंग्रहालयात अभूतपूर्व गर्दी झाल्याचे पाहायला मिळाले. रविवारी एकूण २२ हजार १८२ पर्यटकांनी प्राणीसंग्रहालयाला भेट दिली. यातून प्राणीसंग्रहालयाला ७ लाख ५६ हजार ४६० रुपयांचे उत्पन्न मिळाले. हा आतापर्यंतचा उच्चांक असून आतापर्यंत म्हणजेच कोरोनाच्या आधीसुद्धा २० हजार पर्यंटकांपर्यंतच गर्दीचा आकडा गेला होता. मात्र, यावेळी पहिल्यांदाच गर्दीने २२ हजारांचा आकडा पार केल्याची माहिती प्राणीसंग्रहालय प्रशासनाने दिली आहे.

सुटी नसेल त्या दिवशी जास्त गर्दी होताना दिसत नाही. साधारणतः ४ ते ७ हजारांपर्यंत पर्यटक भेटी देत असल्याने दिसून येते. गेल्या रविवारी म्हणजेच ८ मे रोजीही चांगला प्रतिसाद मिळाला होता. एकूण १७ हजार २५६ पर्यंटकांनी भेटी दिल्या होत्या. त्यातून प्राणी संग्रहालयाला ५ लाख ८७ हजार रुपयांचे उत्पन्न मिळाले होते. कोरोनानंतर प्राणी संग्रहालय सुरु झाल्यापासून २० मार्च ते ७ मे या ४७ दिवसांत ३ लाख ५ हजार ३४४ पर्यटकांनी भेट दिली आहे. यातून प्राणीसंग्रहालयाला आतापर्यंत १ कोटी २२ हजार ९५५ रुपयांचे उत्पन्न प्राप्त झाले आहे.

तिकीट बुकींग ऑनलाईन कधी?

पर्यटकांची तिकीट खरेदी करण्यासाठी तिकीट खिडकीवर रांग लागलेली असते. ती रांग तशीच पुढे पादचारी मार्गांवरही येते. त्यामुळे प्रशासन ऑनलाईन बुकींग सुरु करणार आहे. मात्र, प्रत्यक्षात ही सेवा कधी सुरु होणार असा प्रश्न पर्यटक उपस्थित करत आहेत. ही सेवा लवकर सुरु झाली तर पर्यटकांना तिकीट खिडकीवर रांग लावावी लागणार नाही आणि पादचारी मार्गांवर होणाऱ्या गर्दीचाही सामना करावा लागणार नाही.

कोरोनानंतर लोक उत्साहात बाहेर पडत आहेत. तसेच, दोन वर्षे प्राणी बघता न आल्याने बच्चेकंपनीदेखिल प्राण्यांना पाहण्यासाठी आतूर होती. त्यात आता शाळांना सुट्या असून रविवारच्या सुटीचे औचित्य साधत पर्यटक प्राणी संग्रहालायाला मोठ्या प्रमाणात भेटी देत आहेत. प्राणी संग्रहालयाला भेट देण्यासाठी प्राधान्याने येत असलेल्या सर्व वन्यपर्यटकांचे आभार!

- राजकुमार जाधव, संचालक, राजीव गांधी प्राणीसंग्राहलय, कात्रज.