व्हेनेझुएलामधील घडामोडी चिंताजनक परिस्थितीवर लक्ष असल्याची भारताची प्रतिक्रिया

सकाळ न्यूज नेटवर्क
नवी दिल्ली, ता. ४ : व्हेनेझुएला देशात घडत असलेल्या घडामोडी अतिशय चिंताजनक असून तेथील स्थितीवर भारताचे लक्ष असल्याचे परराष्ट्र मंत्रालयाकडून सांगण्यात आले आहे. अमेरिकी सैन्याने त्या देशाचे अध्यक्ष निकोलस माडुरो आणि त्यांच्या पत्नीला अटक करून अमेरिकेला नेले आहे. या घटनेनंतर जगभरात तीव्र प्रतिक्रिया उमटत आहेत.
व्हेनेझुएलाच्या नागरिकांचे हित आणि त्यांची सुरक्षितता याला भारताचे समर्थन आहे. सर्व संबंधित पक्षांनी शांतता आणि चर्चेच्या माध्यमातून मार्ग काढणे गरजेचे आहे, असे परराष्ट्र मंत्रालयाने निवेदनाद्वारे सांगितले आहे. भारतीय नागरिकांनी अत्यावश्यक कामाशिवाय व्हेनेझुएलाचा प्रवास टाळावा, अशी सूचनाही मंत्रालयाने केली आहे. सध्या जे भारतीय त्या देशात वास्तव्यास आहेत, त्यांनी सावधगिरी बाळगावी, गरजेशिवाय घराबाहेर पडू नये, एकमेकांच्या संपर्कात राहावे आणि कोणत्याही आपत्कालीन परिस्थितीत मदतीसाठी कॅराकस येथील भारतीय दूतावासाच्या संपर्कात रहावे, असे आवाहन करण्यात आले आहे.

जंगलराजकडे वाटचाल : शशी थरुर
अमेरिकेच्या कारवाईवर काँग्रेसच्या नेत्यांनी टीका केली आहे. जागतिक कायदे आणि संयुक्त राष्ट्रांच्या नियमावलीला केराची टोपली दाखविली जात असून ‘बळी तो कानपिळी’ असा सगळा कारभार बनला असल्याची टीका काँग्रेसचे खासदार शशी थरुर यांनी केली आहे. तर, अमेरिकेने केलेली कारवाई म्हणजे साम्राज्यवाद शैलीच्या राजकारणाला नव्याने झालेली सुरुवात असल्याची प्रतिक्रिया अभिषेक मनू सिंघवी यांनी दिली आहे.