Pune News : पुण्यात मद्यपी ‘सुसाट’; वेळेचे उल्लंघन केल्यास परवाना रद्द

पुण्यात रात्री मद्यसेवन करून प्रमुख रस्त्यांवर वाहने भरधाव चालविण्याच्या घटना सर्रास दिसून येत आहेत. अशा मद्यपी वाहनचालकांमुळे पादचारी आणि इतर वाहनचालकांच्या जिवाला धोका निर्माण झाला आहे. पोलिसांनी अशा मद्यपी वाहनचालकांवर कठोर कारवाई करावी, अशी मागणी होत आहे.

अल्पवयीन चालकांवर कारवाई

शहरात विनापरवाना वाहन चालविणाऱ्यांमध्ये अल्पवयीन मुलांचे प्रमाणही वाढले आहे. वाहतूक पोलिसांकडून २०२३ मध्ये विनापरवाना वाहन चालविणाऱ्या १६ वर्षांखालील ४८ अल्पवयीन मुलांवर कारवाई झाली. २०२४ मध्ये १९ मेअखेर २६ अल्पवयीन वाहनचालकांवर कारवाई झाली आहे.

ड्रंक अँड ड्राईव्ह दृष्टिक्षेपात

वर्ष कारवाई

२०२२:३७

२०२३:५६२

१९ मे २०२४:अखेर:४७९

वेळेचे उल्लंघन केल्यास परवाना रद्द

राज्य उत्पादन शुल्क विभागाने कल्याणीनगरमधील घटनेची गंभीर दखल घेतली आहे. नियमित वेळेपेक्षा अधिक काळ पब आणि हॉटेल सुरू ठेवणाऱ्यांचे परवाने रद्द करण्याचा निर्णय विभागाने घेतला आहे. बेकायदा पब, रूफटॉप चालविण्यांवर कडक कारवाई करा, अशा सूचना विभागाचे आयुक्त डॉ. विजय सूर्यवंशी यांनी दिल्या.

सूर्यवंशी म्हणाले, ‘‘मद्यविक्रीच्या वेळेचे उल्लंघन केल्यास हॉटेलचालकांना नोटिसा देण्यास सांगितले आहे. वेळप्रसंगी परवाने रद्द करण्याच्या सूचना दिल्या.’’ जिल्हाधिकारी डॉ. सुहास दिवसे म्हणाले, ‘‘वेळ अथवा हॉटेल सुरू करण्यात येणार आहे, ती जागा योग्य आहे की नाही हे पाहण्याचे व किती वाजेपर्यंत परवानगी द्यायची, हे अधिकार पोलिसांचे आहेत.’’