थोरात स्कूलच्या स्नेहसंमेलनात प्लास्टिकबाबत प्रबोधन

भिगवण, ता. ३१ ः येथील राजमाता अहिल्यादेवी प्रतिष्ठान संचलित विठ्ठलराव थोरात इंग्लिश मीडियम स्कूल व विठ्ठलराव थोरात औद्योगिक प्रशिक्षण संस्था यांचे वार्षिक स्नेहसंमेलन उत्साहात झाले. स्नेहसंमेलनाच्या माध्यमातून प्लास्टिक वापराविषयी प्रबोधन करण्यात आले.
विद्यार्थ्यांनी केलेल्या बहारदार सादरीकरणामुळे स्नेहसंमेलनामध्ये रंगत आली. स्नेहसंमेलनाचे उद्‍घाटन सारिका भरणे यांच्या हस्ते करण्यात आले. कार्यक्रमाच्या अध्यक्षस्थानी डॉ. जयप्रकाश खरड होते. तर ॲड. महेश देवकाते, अनुष्का भरणे, भिगवणचे सरपंच गुराप्पा पवार, संस्थेचे अध्यक्ष बापूराव थोरात, सचिव विजय थोरात, संतोष थोरात, अजय थोरात, नंदकिशोर थोरात, सुशीला थोरात आदी उपस्थित होते.
यावेळी विद्यार्थ्यांनी नृत्य, नाट्य, गीतगायन, समूह नृत्याच्या माध्यमातून प्लास्टिक प्रबोधन, पर्यावरण वाचवा, पाणी आडवा पाणी जिरवा, अन्नाची कदर करा, विकसित भारत, महाभारत, भारुड आदी सादरीकरणातून प्रेक्षकांची मने जिंकली. उल्लेखनीय यश संपादन केलेल्या विद्यार्थ्यांना मान्यवरांच्या हस्ते पारितोषिके प्रदान करण्यात आली.
ॲड. महेश देवकाते यांनी मनोगत व्यक्त केले. प्रास्ताविक मुख्याध्यापिका वंदना थोरात यांनी, सूत्रसंचालन उज्ज्वला वाघ व शुभांगी जगदाळे यांनी केले. तर आभार पद्मसिंह भोसले आणि कावेरी नायब यांनी मानले. स्नेहसंमेलन यशस्वी करण्यासाठी शिक्षक, शिक्षकेतर कर्मचारी व विद्यार्थ्यांनी विशेष परिश्रम घेतले.